Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 240 Hüküm no: 422 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar’a bağlı Viran köy ahalisinden Mustafa ve Deli Ahmet oğlu İsmail’in salyane ve sair masarıfa müdahale etmemesi Ma‘rûz, Üsküdar muzâfâtından Adalar nâhiye[sine] tâbi‘ Viran karyesi ahâlîsinden Süleyman Ağa ve el-Hâc Ali ve el-Hâc İsmail ve Ahmed Çelebi ve Ali Çelebi ve Mehmed Bey ve sâirleri yine ahâlî-i karyeden Mustafa muvâcehesinde mezbûr Mustafa gāib ani’l-meclis Deli Ahmed oğlu İsmail ile yek-dil ve yek-cihet olup bâ-fermân-ı âlî vâki‘ olan tekâlîfi ve sâir karyemizin mesârifini ahâlî-i karyenin re’y ve ma‘rifeti olmaksızın ikisi beynlerinde salyâne ve tevzî‘ edip ve ziyâde akçe tahmîl ve fukarâya tahammüllerinden izdiyâd tevzî‘ ve taksîm ve cümleye gadr deyü def‘a vâki‘ olan teklîfe ziyâde akçe zam eyledikleri hîn-i hesâbda zâhir oldu deyü teşekkî ve fîmâ-ba‘d ahâlî-i karyenin cümlesinin ma‘rifetleriyle tevzî‘ olunup salyâne ve sâir mesârife müdâhale etmemek üzere kıbel-i şer‘den tenbîh olunsun dediklerinde ber-vech-i muharrer merkūm Mustafa’ya tenbîh-i şer‘î olunup ol dahi müdâhale etmemek üzere ta‘ahhüd eylediği huzûr-ı âlîlerine i‘lâm olundu. Fî 21 Recebi’l-ferd sene 1155