Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 123 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mustafa’nın Çengelk’öyü ahalisine eziyet edip ahalinin mal ve ırzlarına zarar verdiğinden köyden ihraç edilmesi Ma‘rûz Medîne-i Üsküdar’a tâbi‘ Çenger karyesi ahâlisinden İmâm Süleyman Efendi b. Abdullah ve İmâm Musa Efendi b. Nebi ve Ahmed Efendi b. el-Hâc Ömer ve İsmail Ağa b. Ahmed ve Ahmed Ağa b. Mehmed ve Ali b. Mustafa ve Ahmed Ağa b. Osman ve Kethudâ Ağa b. el-Hâc Mustafa ve diğer Ali Ağa b. Ali ve Hüseyin Beşe b. Mustafa nâm kimesneler medîne-i mezbûre bâb mahkemesinde meclis-i şer‘-i hatîrde Enderûn-ı hümâyûn’da kışlaların bölükbaşısı Ahmed kulları ma‘rifetiyle ihzâr olunan Maltızoğlu demekle meşhûr Bostanî Mustafa b. Mustafa nâm kimesne muvâcehesinde mezbûr Bostanî Mustafa kendi hâlinde olmayıp zümre-i eşkıyâdan olmağla dâimâ bizim ve sâir ahâli-i karyenin mâl ve ırzlarımıza ta‘arruz ve bi’l-muvâcehe elfâz-ı kabîha ve şütûm-ı galîza ile şetm eylediğinden mâ‘adâ gecelerde menzillerimize duhûl ve eşyâmızı dahi sirka etmekle cümlemiz havf üzere olup mezbûr Mustafa’ya nush ü pend eylediğimizde mütenassıh olmayıp ef‘âl-i sâbıkāsında ısrâr ve bu vechile cümlemizi ızrâr âdet-i müstemirresi olmağla mezbûrdan bi’l-külliye emniyetimiz meslûb olmuşdur deyü mezbûrun sirkatini ve harekât-ı nâ-merziyesini muvâcehesinde ihbâr ve fîmâ-ba‘d karye-i mezbûrede meks ve ikāmet etmeyip tard ve ib‘âd olunmak bâbında fermân-ı âlîleri sudûrunu ahâli-i mezbûreden herbiri istid‘â ve istirhâm eyledikleri mübâşir-i merkūm iltimâsıyla huzûr-ı âlîlerine i‘lâm olundu. Fî-gurrei Cumâdelûlâ sene 1204