Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 180 Hüküm no: 107 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mustafa’nın, küspe ve köftünlarını satmasına engel olan Beziryağcı Praşkova v. Anaştaş ile Aslan v. Yuvan’ın müdahalelerinin men edildikleri Ma‘rûz Medîne-i Üsküdar’da Gülfamhatun mahallesi sükkânından İsmail b. Mustafa nâm kimesne medîne-i mezbûrede mahfil-i bâbda meclis-i şer‘-i hatîrde medîne-i mezbûrede bezir yağcılarından Praşkova v. Anaştaş ve Aslan v. Yuvan nâm zimmîler muvâcehelerinde bu esnâda Tekfurdağı kasabasında kendi mâlım ile iştirâ ve kabz eylediğim ma‘lûmü’l-mikdâr köftün ve küspeyi kayık ile medîne-i mezbûreye nakl ve râyici üzere arabacı ve sâir iktizâ eden kimesnelere bey‘ ederken merkūmân Praşkova ve Aslan zimmîler beni bi-gayrı hakkın men‘ irâdesiyle bey‘ ü şirâma bî-vech müdâhaleleri men‘ ü def‘ olunmak matlûbumdur deyü da‘vâ ve gıbbe’s-suâl merkūmân Praşkova ve Aslan cevâblarında biz yağcı esnâfından olup müdde‘î-i mezbûrun taşradan Üsküdar’a nakl ve âhara bey‘ eylediği köftün ve küspe bizim metâ‘ımız olmağla bey‘ ü şirâsı bize mahsûs olduğuna binâen müdde‘î-i mezbûr İsmail yedinde mevcûd olan köftün ve küspe bize bey‘ eylesin deyü takrîrleri üzere tasaddî eyledikleri da‘vâları meşrû‘a olmadığından mâ‘adâ metâ‘-ı mezkûrun bey‘ ü şirâsı esnâf-ı mezkûreye mahsûs olduğuna dâir yedlerinde sened dahi olmamağla mûcebiyle müdde‘î-i mezbûrun taşradan Üsküdar’a nakleylediği köftün ve küspenin bey‘ ü şirâsına bî-vech müdâhale etmemek üzere merkūmân Praşkova ve Aslan zimmîlere tenbîh olunduğu bi’l-iltimâs huzûr-ı âlîlerine i‘lâm olundu. Fî-gurrei Ş sene 1204