Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 378 Hüküm no: 499 Orijinal metin no: [43b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Hüseyin’in alacak davasında haksız olduğu Ma‘rûz Medîne-i Üsküdar’da Hasanağa mahallesinde sâkine ve zâtı mu‘arrefe Fatıma bt. Hüseyin nâm hatun meclis-i şer‘-i hatîrde üvey babası es-Seyyid Halil b. İbrahim mahzarında mezbûr es-Seyyid Halil târih-i i‘lâmdan on ay mukaddem bâ-temessük yedimden iktirâz ve kabz ve umûruna sarfla istihlâk eylediği seksen guruş hakkımın elli guruşunu yedinden ahz ü kabz ve otuz guruşu zimmetinde bâkī kalmağla taleb ederim deyü da‘vâ ve mezbûr es-Seyyid Halil cevâbında müdde‘iye-i mezbûreye cihet-i mezkûreden ol-mikdâr deyni olduğunu ikrâr lâkin kabzını mu‘terife olduğu elli guruşdan mâ‘adâ otuz guruşu dahi bir ay mukaddem kendiye edâ ve teslîm etmiş idim deyü eylediği def‘ini lede’t-tezkiye adâletleri zâhir olan Mahmud b. Ahmed ve Osman b. Hasan nâm kimesneler şehâdetleriyle vech-i şer‘î üzere isbât etmeğin mûcebiyle müdde‘iye-i mezbûre da‘vâ-yı mezkûresiyle mezbûr es-Seyyid Halil’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-Ca sene 1205