Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 432 Hüküm no: 614 Orijinal metin no: [52a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa b. Ali’nin terekesinin taksiminde çıkan ihtilafın giderildiği Ma‘rûz; Mevâdd-ı şer‘iye istimâ‘ı içün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ İstavros karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûrede mütemekkin Agop Kalfa v. Ağya nâm zimmî meclis-i ma‘kūd-ı mezkûrda sâkin iken bundan akdem vefât eden Mehmed Ağa b. Ali’nin verâseti zevce-i menkûhası Âişe bt. Abdulkadir nâm hatun ile sulbî kebîr oğulları Ali ve Mustafa’ya münhasıra oldukdan sonra tereke-i müteveffâ-yı mezbûra bi’l-verâse vaz‘-ı yedleri mütehakkık olan mezbûr Mustafa asâleten ve zâtı mu‘arrefe mezbûre Âişe kendi nefsinden asıl ve oğlu mezbûr Ali tarafından vekîl olduğu el-Hâc Feyzullah Ağa b. el-Hâc Hasan ve es-Seyyid Mehmed b. Ahmed nâm kimesneler şehâdetleriyle sâbit olmağla vekâleten mahzarlarında müteveffâ-yı mezbûr Mehmed Ağa hayatında târih-i i‘lâmdan on altı ay mukaddem bâ-istiğlâl-i menzil yedimden istidâne ve kabz eylediği üç yüz üç guruşdan bâkī üç guruş ve menzil icâresinden müctemi‘a olan elli bir guruş ki cem‘an elli dört guruş hakkımı kable’l-ahz vefât etmekle tereke-i vâfiyesinden taleb ederim deyü eylediği da‘vâsından bâ-tavassut-ı muslihîn otuz beş guruş bedel mukābelesinde mezbûrûn ile sulh olup ziyâde müdde‘âsı olan on dokuz guruşa müte‘allika âmme-i de‘âvîden mezbûrûnun zimmetlerini ibrâ ve ıskāt onlar dahi sulh ve ibrâyı ba‘de’l-kabûl bedel-i sulh olan meblağ-ı merkūm otuz beş guruşu dahi târih-i i‘lâmdan iki ay tamamında kendiye edâ etmek üzere bi’t-taleb mezbûrûnu tecîl eyledikde onlar dahi ecel-i merkūm hulûlünde bedel-i sulh-ı mezkûru müdde‘î-i merkūm Agob Kalfa’ya edâya ta‘ahhüd birle kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 6 min-Ş sene 1205