Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 457 Hüküm no: 666 Orijinal metin no: [55b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin muhâlaa yoluyla boşadığı karısı Fatma’ya olan borcunu ödemesi Ma‘rûz; Medîne-i Üsküdar’da Toygar Hamza mahallesinde sâkine ve zâtı mu‘arrefe Fatıma bt. Ali nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı el-Hâc Mehmed b. Ali mahzarında mezbûr el-Hâc Mehmed sekiz guruş mehr-i müeccel tesmiyesiyle zevcim olup târih-i i‘lâmdan bir sene mukaddem beni tatlîk etmekle zimmetinde mütekarrir ve ma‘kūdun aleyh olan meblağ-ı mezkûr sekiz guruş mehrim ile yedimden iktirâz ve kabz ve umûruna sarfla istihlâk eylediği dört guruş ki cem‘an on iki guruş hakkımı hâlâ taleb ederim deyü ba‘de’d-da‘vâ ve’l-istintâk ve’l-ikrâr lâkin târih-i mezkûrda mehr-i mezkûru ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere benimle muhâla‘a ve hukūk-ı zevciyetden zimmetimi ibrâ edip ben dahi ibrâsını kabûl etmiş idim deyü eylediği def‘ini Ebûbekir b. Abdulkadir ve es-Seyyid Süleyman b. el-Hâc Ahmed nâm kimesneler şehâdetleriyle vech-i şer‘î üzere isbât etmeğin mûcebiyle müdde‘iye-i mezbûre Fatıma hatun mehr-i mezkûr da‘vâsıyla mezbûr el-Hâc Mehmed’e bî-vech mu‘ârazadan ba‘de’l-men‘ mukırr u mu‘terif olduğu meblağ-ı merkūm dört guruşu müdde‘iye-i mezbûre Fatıma Hatun’a edâ ve teslîmiyle mezbûr el-Hâc Mehmed şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 5 min-Şevvâl sene 1205