Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 564 Hüküm no: 873 Orijinal metin no: [71a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hanım’ın boşandığı kocası Mustafa b. Osman ile mihir konusunda anlaştığı Ma‘rûz; Mahrûse-i Galata muzâfâtından kasaba-i Kasımpaşa’da Karanlıkçeşme mahallesinde sâkine mu‘arrefetü’z-zât Havva bt. Mustafa nâm hatun medîne-i Üsküdar’da mahfil-i bâbda meclis-i şer‘-i hatîrde zevc-i sâbıkı Mustafa b. Osman mahzarında ben mezbûr Mustafa’nın yirmi beş guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan iki sene mukaddem beni tatlîk etmekle zimmetinde mütekarrir ve ma‘kūdun-aleyh olan mârrü’z-zikr yirmi beş guruş mehrimi zevc-i sâbıkım mezbûr Mustafa’dan bundan akdem taleb ve da‘vâ sadedinde bulunmuş idim el-hâletü hâzihî ben da‘vâ-yı mezkûremden zevc-i sâbıkım mezbûr Mustafa ile on iki guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı merkūm on iki guruşu zevc-i sâbıkım mezbûr Mustafa yedinden tamamen ahz ü kabz edip ziyâde mehrime ve hukūk-ı zevciyete ve sâire müte‘allika âmme-i de‘âvîden zevc-i sâbıkım mezbûr Mustafa’nın zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt ve her birimiz âharın ber-vech-i muharrer ibrâsını kabûl eyledik deyü takrîrini zevc-i sâbıkı mezbûr Mustafa ba‘de’t-tasdîk bi’l-iltimâs huzûr-ı âlîlerine i‘lâm olundu. Fî 27 min-Muharrem sene 1206