Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 440 Hüküm no: 469 Orijinal metin no: [105b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saçma ve çubuk kurşun dökülmemesi tenbihi Bâ-mühr-i hazret-i efendi. Ma‘rûz. Arzuhâl eden kurşuncu esnâfı meclis-i şer‘de Yahûdi tâifesinden Mosi ve Hayim ve Kamal nâm Yahûdiler muvâcehelerinde kadîmü’l-eyyâmdan bu ana gelince saçma kurşun ve çubuk kurşun dökmek esnâfımız ihtiyârlarına mahsûs ve nizâmımızdan iken merkūmûn Yahûdiler nizâmımıza mugāyir saçma kurşun ve çubuk kurşun dökmeleriyle men‘ olunmak murâdımızdır deyü da‘vâ ve yirmi beş nefer Müslimîn dahi hâl vech-i meşrûh üzere olduğunu muvâcehelerinde haber vermeleriyle nizâmları üzere saçma kurşun ve çubuk kurşunu merkūmûn Yahûdiler dökmemek üzere tenbîh olunduğu huzûr-ı âlîlerine i‘lâm olundu. Fî 3 Rebî‘ülevvel sene [1]143.