|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 255 Hüküm no: 357 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mustafa Beşe’nin kölesini azat ettiği
Zümre-i râcilînden olup yetmiş yedi cemâ‘atinden Mustafa Beşe b. el-Hâc Hasan nâm râcil meclis-i şer‘-i hatîr-i lâzımü’t-tevkīrde uzun boylu, çatık kaşlı, gök elâ gözlü, sarışın, Macariyyü’l-asl işbu bâ‘isü’l-kitâb Yusuf b. Abdullah muvâcehesinde ikrâr-ı tâm ve takrîr-i kelâm edip târîh-i kitâbdan üç sene mukaddem vilâyet-i Rumeli’nde Budin serhaddinde harbî kefere yedinde olan Tata nâm kal‘adan mezbûr Yusuf dâr-ı İslâm’a çıkıp şeref-i İslâm ile müşerref olup bu âna değin bana hürmet edip ben dahi mezbûr Yusuf rakīk olur zu‘muyla imsâk eylemişdim. Hâlâ mevsûf-ı mezbûrun hürmeti zâhir ve müte‘ayyen olmağın kasr-ı yed edip sebîlin tahliye eyledim, mezbûr Yusuf sâir ahrâr-ı asliyyîn gibi hür [olup] benim aslâ alâka ve medhalim yokdur dedikde mâ-hüve’l-vâki‘ gıbbe’t-taleb sebt ü ketb olundu.
Fi’l-yevmi’l-hâdî ve’l-ışrîn min-Cemaziye’l-âhire li-sene erba‘a ve sittin ve elf.
Şuhûdü’l-hâl: Durmuş Beşe b. Abdullah, Nasuh Beşe b. Zülfikār, Ali Beşe b. Ali?, Mustafa Beşe b. Durmuş, Ali Beşe b. Abdullah, Mehmed Efendi kâtib-i masraf, İbrahim Efendi vekîlharç, Hasan Efendi el-imâm, Ahmed Çelebi kâtib-i kilâr, Sefer Bey kilârcıbaşı ve gayruhum.
|