Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 463 Hüküm no: 519 Orijinal metin no: [110b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Buğday döğücü esnafının Kapan-ı dakik’den buğday alırken kadimleri üzere kendi kileleri ile ölçüm yapmaları için hüküm talebi Ma‘rûz. Ashâb-ı arzuhâl olan buğday döğücü hırfetinin kethüdâları Mustafa ve yiğitbaşıları Ömer Odabaşı ve erbâbından cemm-i gafîr ve cem‘-i kesîr meclis-i şer‘de kadîmü’l-eyyâmdan berü her birimiz buğday iktizâ ettikde sahîhü’l-ayâr tammü’l-vezn kendi kilemiz ile kileleyüp bu vech üzere nizâm-ı hâlimiz var iken üç seneden berü Kapan-ı dakīk’den ücret-i gāliye ile bilâ-sened kile ihdâs olunmağla bi-gayr-ı hakkın her birimize rencîde ve te‘addî ve gad[r] olmuşdur deyü teşekkî eylediklerinde hakīkat-ı hâl husûs-ı mezkûra vukūf-ı tâmları olan bî-garaz Müslimînden tefahhus için kıbel-i şer‘den irsâl olunan Mustafa Efendi dâ‘îleri Kapan-ı dakīk’e varıp husûs-ı mezkûru navluncu tâifesinden mu‘temedün-aleyh mazbûtü’l-esâmî otuz beş nefer kimesnelerden tefahhus eylediğinde fi’l-hakīka ashâb-ı arzuhâl navluncu tâifesinden ve sâir kimesnelerden buğday iştirâ ettiklerinde kadîmden berü sahîhü’l-ayâr tammü’l-vezn kendi kileleriyle iştirâ edegelip Kapan-ı dakīk’den kendilere ücret-i gāliye ile bilâ-sened kile teklîfi muhdes ve buğdayın si‘rini ziyâde iktizâ etmekle ibâdullâh mutazarrır ve mezbûrûna rencîde ve gadr ve te‘addîdir deyü her biri alâ-tarîkı’ş-şehâde ihbâr [111a] ettiklerini mahallinde tahrîr ve ma‘an ba‘s olunan ümenâ-i şer‘le meclis-i şer‘a gelip ba‘de’l-inhâ ashâb-ı arzuhâl fîmâ-ba‘d kendilere ber-vech-i muharrer rencîde ve gadr ve te‘addî olunmamak bâbında hükm-i hümâyûn iltimâs eyledikleri huzûr-ı âlîlerine i‘lâm olundu. Fermân men-lehü hazretlerinindir. Fî 17 Rebî‘ülâhir sene [1]143.