Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 495 Hüküm no: 587 Orijinal metin no: [118a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevliyet davasının zaman aşımından dolayı hükmü olmadığı Ma‘rûz. Dîvân-ı âlî çavuşlarından ( ) Çavuş mübâşeretiyle meclis-i şer‘a ihzâr olunan merhûm Koca Mustafa Paşa Vakfı’nda bâ-berât-ı âlîşân mütevellî olan Mustafa Efendi’den hasmı Ali b. Mustafa meclis-i şer‘de merhûm mûmâ-ileyh hayâtında vakfının tevliyeti ba‘de’l-inkırâzi’l-evlâd utekāsına ve ebnâ-yı utekāsına alâ-mâ-tenâselü ve te‘âkabû şart ve ta‘yîn ben merhûm mûmâ-ileyhin ebnâ-yı ebnâ-yı ebnâ-yı utekāsından olan mezbûr Mustafa’nın sulbî oğlu olup tevliyet-i mezkûre hakk-ı meşrûtam iken mezbûr Mustafa Efendi bi-gayr-ı hakkın zabt ve tasarruf etmekle kasr-ı yedine tenbîh ve şart-ı vâkıf üzere bana tevcîh olunmak taleb ederim deyü da‘vâ eyledikde mezbûr Mustafa Efendi cevâbında tevliyet-i mezkûreye bin doksan beş târihinden berü ecânibden ma‘lûmü’l-esâmî on nefer kimesneler kırk sekiz sene mütevellî ve bilâ-nizâ‘ mutasarrıf olup ebnâ-yı utekādan olmak üzere kimesne kat‘â taleb da‘vâ etmeyip müdde‘î-i mezbûr dahi bilâ-özr otuz yedi sene sükūt etmekle şer‘an da‘vâsı istimâ‘ olunmamak bâbında yedimde olan fetvâ-yı şerîfeye ba‘de’n-nazar bî-vech mu‘ârazadan men‘ olunması matlûbumdur deyü da‘vâyı def‘ ve takrîrine muvâfık bir kıt‘a fetvâ-yı şerîfe ibrâz edicek mezbûr Ali kaziyye bi’l-cümle minvâl-ı muharrer üzere idiğini ikrâr u i‘tirâf eylediğinden mâ‘adâ müdde‘âsına ityân eylediği şâhidlerin şehâdetleri simâ‘la olup mahz-ı şürût-ı vakıfda tesâmu‘la şehâdet dahi makbûl olmayıp da‘vâ-yı mersûmesi lağv-ı mahz olduğu lede’ş-şer‘ zâhir olmağın ber-mûceb-i fetvâ-yı şerîfe mezbûr Ali bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 13 Cumâdelûlâ sene [1]143.