Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 503 Hüküm no: 608 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedî Mehmed’in kendi halinde olacağını taahhüt ettiği Ma‘rûz. Mumcu İbrahim Beşe mübâşeretiyle ihzâr-ı şer‘ olunan Mühtedî Mehmed Beşe hasmı Kostantin nâm zimmî meclis-i şer‘de mezbûr Mühtedî Mehmed muvâcehesinde vilâyet-i Rumeli’nde İzdin kasabasına tâbi‘ Dimyan nâm karye ahâlîsinden olmağla târih-i kitâbdan iki ay mukaddem karye-i mezbûrede vâki‘ menzilimi basıp ehl ü ıyâlimi tahvîf eyledikden mâ‘adâ mezbûr Mehmed’in bu misillü fesâd ve şekāvet âdet-i müstemirresidir deyü da‘vâ eyledikde karye-i mezbûre ahâlîsinden müseccelü’l-esâmî yirmi nefer kimesneler dahi mezbûr Mehmed’in ber-vech-i meşrûh sû-i hâlini ihbâr ve kendiden teşekkî etmeleriyle min-ba‘d kendi hâlinde olup karye-i mezbûrede sâkin olmamak üzere ta‘ahhüd eylediği ba‘de’t-tescîl huzûr-ı âlîlerine i‘lâm olundu. Fî 2 Cumâdelâhire sene [1]143.