Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 522 Hüküm no: 651 Orijinal metin no: [124b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin evinden hırsızlık yaptıklarını iddia ettiği Pasdırmacı Ahmed ve Çilingir Gabril’in kötü hallerine rastlanmadığı Ma‘rûz. Sâhib-i arzuhâl Ali Efendi meclis-i şer‘de târih-i i‘lâmdan yirmi iki gün mukaddem kable’l-asr menzilim açılıp mecmû‘u yirmi beş bin beş yüz akçe kıymetli benim ve zevcem Âişe nâm hatun ile oğlum İsmail’in eşyâ-i ma‘lûmelerimiz sirka olunmağla mezbûrân Pasdırmacı Ahmed ve Çilingir Gabril mazannam olmağla mezbûrâna suâl olunması murâdımdır deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını beyâna kādir olmayıp mezbûrân Pasdırmacı Ahmed ve Çilingir Gabril’e bi’t-taleb tahlîf-i şer‘î ile ba‘de’t-tahlîf mezbûrânın keyfiyet-i ahvâlleri tefahhus olunmak bâbında sâdır olan fermân-ı âlîlerine imtisâlen kıbel-i şer‘den ta‘yîn ve irsâl olunan Kâtib Hüseyin Efendi dâ‘îleri asesbaşı hasekisi olan Mehmed Beşe kulları ile mezbûr Pasdırmacı Ahmed’in sâkin olduğu Kızıltaş Mahallesi’ne varıp keyfiyet-i ahvâli mahalle-i mezbûre imâmı Ahmed Efendi ve cemâ‘atinden yirmi nefer kimesnelerden ve merkūm Çilingir Gabril zimmînin sâkin olduğu Molla Kestel Mahallesi ahâlîsinden yirmi beş nefer bî-garaz kimesnelerden her birilerinin keyfiyet-i ahvâllerini tefahhus olundukda mezbûrân kendi hâllerinde olup târih-i i‘lâma gelince bir nesnelerini görmedik deyü hüsn-i hâllerini haber verdiklerini mevlânâ-yı mezbûr mahallinde ketb ü tahrîr ve meclis-i şer‘a gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 26 Cumâdelâhire sene [1]143.