Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 567 Hüküm no: 749 Orijinal metin no: [137b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrafın zimmetinin ibrası Ma‘rûz. Mumcu Ali Beşe mübâşeretiyle Bâb Mahkemesi’ne ihzâr olunan sarraf tâifesinden Haçador zimmînin hasımları Lefter v. Praşkeva ile zevcesi Kiryali bt. Yorgi nâm Nasrâniye meclis-i şer‘de bir gün mukaddem oğlumuz hâzır bi’l-meclis Toma zimmîyi merkūm sarraf tahrîk ve ifsâdıyla mâlımızdan elli altın ve yirmi guruş kıymetli iki altın yüzüğümü hufyeten ahz u kabz ve mezbûr Sarraf Haçador’a def‘ ve teslîm etmişdir deyü üzerine da‘vâya tasaddî etmişiken hâlâ zikrolunan da‘vâ mezbûr sarraf üzerine ifk ü iftirâ ve kat‘â aslı olmamağın husûs-ı mezkûra müte‘allika âmme-i da‘vâ ve kâffe-i mütâlebât ve muhâsamâtdan her biri mezbûr sarrafı ibrâ ve iskāt eyledik dedikleri tescîl ve bi’l-iltimâs huzûr-ı âlîlerine i‘lâm olundu. Fî 14 min-şehri Ramazan sene [1]143.