Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 404 Hüküm no: 445 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in Gülbuy adlı cariyeyi Abbas’dan kusurlarını bilerek aldığından iade edemeyeceği Ma‘rûz Sâhib-i arzuhâl İbrahim Bâb Mahkemesi’nde meclis-i şer‘de derûn-ı arzuhâlde mezkûrü’l-ism Abbas mahzarında târîh-i i‘lâmdan on bir gün mukaddem mezbûr Abbas işbu Kalmukıyetü’l-asl Gülbuy nâm câriyeyi sağ gözünde olan ben ayıbından mâ‘adâ sâir uyûbdan sâlime olmak üzere iki yüz on beş guruşa bana bey‘ ve temlîk ve teslîm ben dahi ber-vech-i muharrer iştirâ ve temellük ve tesellüm etmiş idim, hâlâ câriye-i mezkûrenin sol gözünde tavuk karası ayıbıyla mu‘ayyebe olmağla ayıb-ı mezkûruna binâen câriye-i mezkûreyi red murâd ederim deyü da‘vâ eyledikde ol dahi cevâbında câriye-i mezkûreyi iki yüz on beş guruşa ber-vech-i muharrer bey‘ini ve ayıb-ı sânîyi ikrâr lâkin mezbûr İbrahim câriye-i merkūmeyi cemî‘ uyûbuyla kabûl etmiş idi deyü ba‘de’d-def‘ ve’l-inkâr merkūm Abbas ber-vech-i muharrer def‘ini Hüseyin b. Ebubekir ve Ahmed b. İbrahim ve es-Seyyid Hüseyin b. Ali şehâdetleriyle merkūm İbrahim muvâcehesinde vech-i şer‘î üzere isbât etmeğin mûcebince müdde‘î-i merkūm İbrahim bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 27 min-Zilhicce sene 1152.