Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 411 Hüküm no: 460 Orijinal metin no: [63b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalçacı Mehmed’in nizamlarına aykırı harekette bulunmaması Nalçacılardan Mehmed’in i‘lâmıdır Ma‘rûz İstanbul’da vâki‘ nalçacı esnafından du‘âcıları Mehmed Efendi ve yiğitbaşıları Ahmed Çelebi ve ehl-i hibreleri Mustafa Çelebi ile ustalarından yirmi nefer Müslim ve on beş nefer zimmîler Mahkeme-i Bâb’da meclis-i şer‘de esnaf-ı mezbûre erbâbından Odunkapılı Mehmed b. Yusuf muvâcehesinde kethüdâları Halil Çelebi b. Mustafa hâzır olduğu halde mezbûr Mehmed esnafımızdan olup lâkin yedimizde olan müte‘addid hüccet ve i‘lâm mantûku üzere beynimizde verilen nizâm-ı kadîmimize mugāyir vaz‘ u hareket edip nizâmımızın ihtilâline bâ‘is ü bâdî olduğundan mâ‘adâ kethüdâlığı isterim ve kırk akçe ulûfe peydâ ve hazîne-mânde ederim deyü cümlemizi ta‘cîz ve rencîde ve cevr ü ezâ etmekle mezbûr Mehmed’den bir vechile emniyetimiz yokdur ve hâlâ kethüdâmız olan merkūm Halil Çelebi’nin evzâ‘ ve etvârından cümlemiz hoşnûd ve râzılarız deyü kethüdâ-yı merkūm Halil Çelebi’nin hüsn-i hâlini ve mezbûr Mehmed’in sû-i hâl üzere olduğunu her biri alâ-tarîkı’ş-şehâde haber verdikleri ba‘de’t-tescîl fîmâ-ba‘d mezbûr Mehmed’e ber-mantûk-ı hüccet ve i‘lâm nizâm-ı kadîmlerine mugāyir vaz‘ u hareket etmemeğe tenbîh olunmağın mûcebince men‘ olunmak üzere yedlerine tuğrâlı emr-i âlî ricâ eyledikleri huzûr-ı âlîlerine i‘lâm olundu. El-emru li-men-lehü’l-emr. Fî 23 min-Zilhicce sene 1152.