Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 481 Hüküm no: 611 Orijinal metin no: [74a-9] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Duhancı Mehmed’e borcu olan Süleyman Efendi ile varisleri arasındaki davada sulh sağlandığı Bâ-mühr-i efendi Ma‘rûz Mahmiye-i İstanbul’da Karabaş mahallesinde sâkin bundan akdem vefât eden Boşnakoğlu demekle arîf Duhancı Mehmed b. Hüseyin b. Abdullah’ın verâseti zevcesi Zahide ve sulbî sagīr oğlu Mustafa ve sulbiye kebîre kızları Rukiye ve Hadîce’ye ba‘de’l-inhisar sagīr-i mezbûrun vâlidesi ve vasiye-i mansûbesi olup zâtı ta‘rîf-i şer‘î ile mu‘arrefe olan mezbûre Zahide asâleten ve vesâyeten ve yine kendi tarafından asîl ve li-ebeveyn kız karındaşı mezbûre Hadîce tarafından husûs-ı âti’l-beyânda sulh ve ibrâya vekîl olduğu zâtlarını ma‘rifet-i şer‘iyye ile ârifân Halil Çelebi b. Hasan ve Ali Çelebi b. Mehmed şehâdetleriyle şer‘an sâbit olan mezbûre Rukiye asâleten ve vekâleten meclis-i şer‘de İmâm Süleyman Efendi b. Zeynelabidin muvâcehesinde mûrisimiz müteveffâ-yı mezbûrun mezbûr Süleyman Efendi zimmetinde duhân bahâsından elli iki bin yedi yüz yirmi akçe hakkı olup kable’l-ahz vefât ve meblağ-ı mezbûr bize mevrûs olmağla hâlâ asâleten ve vekâleten mezbûr Süleyman Efendi’den taleb ederiz deyü eyledikleri da‘vâlarından sulh-ı mezbûr sagīr hakkında her vechile elvâ olmağla yüz yirmi guruş üzerine sulh olup mâ‘adâsına müte‘allıka âmme-i da‘vâdan mezbûr Süleyman Efendi’nin zimmetini asâleten ve vekâleten ba‘de’l-ibrâ bedel-i mezkûru târîh-i i‘lâmdan on gün tamâmına dek edâ etmek üzere mezbûr Süleyman Efendi’yi temhîl ve tecîl eylediklerinde mezbûr Süleyman Efendi’nin zevce[si] hâzıra bi’l-meclis Havva bt. İbrahim nâm hatun bedel-i mezkûra ber-vech-i muharrer kefîl olduğu ba‘de’t-tescîl huzûr-ı âlîlerine i‘lâm olundu. Fî 9 S sene 1153.