Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 587 Hüküm no: 821 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayır sahibi Gülistan’ın vakfettiği menzile ait tevliyetin Abdullah Efendi’nin kendi rızasıyla bırakması ile Mehmed Efendi’ye verildiği Hurrire bi-ma‘rifeti …? ve ene’l-fakīr ileyhi azze şânühû Mehmed b. Mehmed el-müvellâ hilâfeten bi-Kostantıniyye el-mahmiye -Gufira lehümâ- Tevliyet-i ferâğ Mahmiye-i İstanbul’da Bıçakcı Alaeddin mahallesinde sâkin umdetü’l-meşâyihi’l-kirâm eş-Şeyh Abdullah Efendi b. (°) Efendi tarafından husûs-ı âti’l-beyânda vekîl olduğu Mehmed b. Ahmed ve İbrahim b. Derviş Mehmed nâm kimesneler şehâdetleriyle şer‘an sâbit olan el-Hâc İbrahim b. Mustafa nâm kimesne meclis-i şer‘-i şerîf-i enverde müvekkil-i mûmâ-ileyhin kerîmezâdesi sâhib-i hâze’l-kitâb es-Seyyid Mehmed Efendi b. İbrahim nâm kimesne mahzarında bi’l-vekâle ikrâr-ı tâm ve takrîr-i kelâm edip cennet-mekân merhûme Gülistan nâm sâhibetü’l-hayr mahmiye-i mezbûrede Salih Paşa mahallesinde vâki‘ ma‘lûmü’l-hudûd ve’l-müştemilât vakfeylediği bir bâb menzil icâre-i mu‘accele ve müeccele ile îcâr olunmayıp beher mâh ecr-i misli ile îcâr ve hâsıl olan icâreden yevmî bir sağ akçe menzil-i mezbûrun ta‘mîri ve termîmine harc ü sarf oluna ve bir akçesi dahi cihet-i tevliyet ola ve zikr olunan iki akçeden fazlası mahalle-i mezbûre[de] vâki‘ Salih Paşa Câmi‘i’nde haftada bir gün talebe-i ulûma tedrîs müvekkilem mûmâ-ileyhe meşrûta olup ba‘de edâi’l-hizmet zikri sebk eden iki akçeden fazlaya mutasarrıf ola cihet-i tedrîs ile menzil-i mezbûrun tevliyeti müvekkilim mûmâ-ileyh eş-Şeyh Abdullah Efendi’ye meşrûta ola deyü işbu bir kıt‘a vakfiye-i ma‘mûlün-bihâsında tansîs ve tasrîh etmiş idi, hâlâ müvekkilim mûmâ-ileyh eş-Şeyh Abdullah Efendi ber-vech-i muharrer mutasarrıf olduğu dersiye ve tevliyeti hüsn-i rızâsıyla merkūm es-Seyyid Mehmed Efendi’ye ferâğ ve kasr-ı yed ol dahi kabûl ve hizmet-i lâzımesini kemâ-yenbağī edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Ra sene 1153. Şuhûdü’l-hâl: Salih Çelebi b. Süleyman, Mehmed Çelebi b. Ahmed, Ahmed b. Süleyman, el-Hâc Mustafa b. Mehmed, Receb Çelebi b. Abdullah