Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 95 Hüküm no: 13 Orijinal metin no: [2b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas’ın Sarıhacı köyünden olup İstanbul’da aşçılık yapan Papok v. Nikagos’un Abdullah Ağa b. Hacı Osman’a açtığı alacak davasında haksız bulunduğu Ma‘rûz Anadolu’da medîne-i Sivas’a tâbi‘ Sarıhacı nâm karye ahâlîsinden mahrûse-i Galata’ya tâbi‘ kasaba-i Beşiktaş’da aşçılık ticâreti üzere mütemekkin sahib-i arzuhâl Papok v. Nikagos zimmî meclis-i şer‘-i enverde nefs-i medîne-i mezkûre ahâlîsinden arzuhâlde mezkûr Abdullah Ağa b. Hacı Osman muvâcehesinde mezbûr Abdullah Ağa babasının babası Hacı Yusuf b. Hacı Receb nâm kimesne tarafından vekâletle medîne-i mezkûrede meclis-i şer‘-i şerîfde mârrü’z-zikr Sarıhacı karyesi ahâlîsinden Sökyas v. Azarya nâm zimmî muvâcehesinde ceddim ve müvekkilim mezbûr Hacı Yusuf’un benim için Aşçı Papok zimmetinde cihet-i karzdan bâ-temessük elli sekiz guruş hakkı olup ve meblağ-ı mezbûra sen bi’l-emr ve’l-kabûl kefîl olmuşidin deyü merkūm Sökyas zimmîden bi’l-vekâle da‘vâ ve müdde‘âsını ba‘de’l-isbât ve’l-hükm ve’l-edâ merkūm Sökyas zimmî dahi karındaşı işbu hazır bi’l-meclis Andreyas zimmî vekâletiyle meblağ-ı müeddâ-bihi olan elli sekiz guruşun kırk guruşunu bi-tarîkı’s-sulh benden ahz edip ancak işbu mezbûr Abdullah Ağa’nın ceddi ve müvekkili mezbûr Hacı Yusuf’a benim zimmetimde nesne verecek deynim yoğiken mezbûr Abdullah Ağa meblağ-ı mezbûru merkūm Sökyas zimmîden ber-vech-i muharrer şâhid-i zûr ikāmetiyle hükmettirip almağla hâlâ meblağ-ı mezkûru mezbûr Abdullah Ağa’dan istirdâd ederim deyü olan da‘vâsı takrîr-i meşrûhu üzere sahîha olmamağla hasmı mezbûra şer‘an suâl dahi teveccüh etmeyip müdde‘î-i merkūm Aşçı Papok zimmî bî-vech-i şer‘î <> mu‘ârazadan men‘ olunduğu mahkeme-i bâbdan huzûr-ı âlîlerine i‘lâm olundu. Fî 7 Rebî‘ülevvel sene 1162