Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 251 Hüküm no: 259 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemankeş Kara Mustafa Paşa mahallesi ahalisinin, Hatice bt. Abdullah, kocası Mehmed b. İbrahim ve annesi Fatma’dan emniyetleri olmadığından mahalleden uzaklaştırılmaları talepleri Ma‘rûz İstanbul’da Kemânkeş Kara Mustafa Paşa mahallesinde vâki‘ Paşa Odaları demekle ma‘rûf odalarda sâkine sahibe-i arzuhâl Şerife İsmihan bt. Mehmed Mahkeme-i Bâb’da meclis-i şer‘de zikrolunan odalarda sâkine olup derûn-ı arzuhâlde mezkûreti’l-ism Hadîce bt. Abdullah nâm hatun mahzarında târih-i i‘lâmdan dört gün mukaddem sâkine olduğumuz odalarda mezbûre Hadîce şütûm-ı galîza ile bana şetm eyledi deyü mûceb-i şer‘îsini ba‘de’d-da‘vâ ve’l-inkâr müdde‘iye-i mezbûre Şerife İsmihan ber-vech-i muharrer müdde‘âsını ahrâr-ı ricâl-i Müslimînden mahalle-i mezbûre ahâlîsinden Molla Mustafa b. Mehmed ve el-Hâc Mustafa b. Ahmed nâm kimesneler şehâdetleriyle mezbûre Hadîce muvâcehesinde vech-i şer‘î üzere ba‘de’l-isbât mûcebiyle mezbûre Hadice’ye ta‘zîr iktizâ eylediğinden sonra zikrolunan Kemânkeş Mustafa Paşa mahallesi müezzini Molla Mustafa b. Mehmed ve ahâlîsinden Mustafa b. Osman ve Mustafa Odabaşı b. Abdullah ve es-Seyyid Ahmed b. el-Hâc Halil ve el-Hâc Mustafa b. Ahmed ve es-Seyyid Taha b. Hüseyin ve Ali b. Mahmud ve İsmail b. Ahmed ve Hızır b. Mahmud ve Abdullah b. Mustafa ve es-Seyyid Salih b. Halil nâm kimesneler meclis-i şer‘de mezbûre Hadîce kendi hâlinde olmayıp dâimâ bizlere ve sâir ahâlî-i mahalleden ricâl ve nisâya hilâf-ı şer‘-i şerîf itâle etmekle mezbûre Hadîce Hatun’dan ve gerek gāibetü ani’l-meclis vâlidesi Fâtıma Hatun’dan ve zevci Mehmed b. İbrahim’den bir dürlü emniyetimiz olmadığından mâ‘adâ bundan akdem mezbûre Hadice’nin sû’-i hâli ihbârıyla bir def‘a dahi i‘lâm-ı şer‘î olmuşidi deyü herbiri ba‘de’t-teşekkî mezbûre Hadice’nin zevci mezbûr Mehmed ve vâlidesi mezbûre Fâtıma ile zikrolunan odalardan ihrâcını iltimâs eyledikleri huzûr-ı âlîlerine i‘lâm olundu. Fî 12 min-Receb sene 1162