Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 342 Hüküm no: 415 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İsa mahallesi ahalisinin, hal ve hareketlerinden memnun olmadıkları ve kendilerini tehdit eden Kürkçü Todori v. Nikola’nın mahallelerinden ihraç edilmesi talepleri Ma‘rûz Mahmiye-i İstanbul’da el-Hâc İsa mahallesi imâmı Hacı Hasan Efendi b. Abdurrahman ve ahâlîsinden Ali Çelebi b. Mehmed ve Halil Beşe b. Mustafa nâm kimesneler ile yine mahalle-i mezbûre mütemekkinlerinden Yorgi v. Dimitri ve Panayot v. Petro ve Yorgi v. Panayot ve Ligori v. Kostantin ve Vasil v. Mihal ve Mihal v. Nikola nâm zimmîler meclis-i şer‘de mahmiye-i mezbûrede Abdi Subaşı mahallesi mütemekkinlerinden Kürkçü Todori v. Nikola nâm zimmî muvâcehesinde mahallemiz ahâlîsinden Aleksan nâm zimmînin menzilinde müste’cireten sâkine olan işbu hâzıra bi’l-meclis Saltana bt. Petro nâm zimmiye kendi hâlinde olmayıp dâimâ kendiye nâ-mahrem olan Müslim [ve] zimmîden erâziller ve eşhâsı menziline getirip alenen fısk ve fesâd üzere olmağla mahallemizden ihrâc murâd eylediğimizde işbu merkūm Kürkçü Todori zimmî mesfûre Saltana’yı mahalleden ihrâc ederseniz sizlerden dört yüz guruş taleb ve tahsîl ettiririm ve mahallenizi ihrâk bi’n-nâr ederim deyü bizi tahvîf ve nefsü’l-emr mesfûr Todori öteden beri kendi hâlinde olmayıp eşirrâdan ve ehl-i fesâddan olmağla merkūm Kürkçü Todori zimmîden emniyet ve râhatımız yokdur deyü teşekkî birle sû’-i hâlini ihbâr [54b] etmeleriyle merkūm Kürkçü Todori’nin ta‘zîri re’y-i hazret-i âsafânelerine ihâle olunduğu ma‘lûm-ı devletleri buyruldukda emr ü fermân men-lehu’l-emrindir. Fî 20 Şevval sene 1162