Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 508 Hüküm no: 687 Orijinal metin no: [89a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı esnafının satışı kendilerine ait yapağı, döğülmüş yün sattıklarını şikayet ettikleri Ahsakya ve Avram’ın bir daha yün satışı yapmama sözü vermeleriyle sulh oldukları Ma‘rûz Mahmiye-i İstanbul’da vâki‘ yorgancı tâifesinin kethudâları el-Hâc Mehmed ve yiğitbaşıları Yahya Çelebi ve ihtiyâr ustalardan el-Hâc Ömer ve Mehmed Çelebi ve Mustafa Çelebi ve Ali Çelebi ve diğer Mustafa Çelebi ve sâirleri Bâb Mahkemesi’ne ihzâr ettirdikleri Ahsakya v. Yoda ve Avram v. Yako nâm Yahûdiler muvâcehelerinde işbu yedimizde olan müte‘addid senedâtlarımız mantûkunca bizim hirfetimizde [hirfetimize] mahsûs olan yapağı ve döğülmüş yün ve sâir metâ‘ımızı ecânibden bir kimesne iştirâ ve bey‘ edegelmiş değil iken mesfûrân Ahsakya ve Avram Yahûdilerin çarşıya getirip bey‘ eyledikleri işbu yapağı döğülmüş ve kalb ve çürük olup kadîmî beynimizde verilegelen nizâmımıza mugāyir olmağla mesfûrân Ahsakya [ve Avram] Yahûdiler yapağı bey‘inden men‘ ve def‘ olunmaları matlûbumuzdur deyü teşekkî eylediklerinde fi’l-hakīka mesfûrân Ahsakya ve Avram Yahûdiler tâife-i mezbûrûna mahsûs olan yapağı ve döğülmüş yün bey‘ eylediklerini ve bey‘ eyledikleri yün kalb ve çürük olduğunu ba‘de’l-ikrâr ve’l-i‘tirâf nizâm-ı kadîmlerine mugāyir döğülmüş ve kalb ve çürük yapağı bey‘ etmemek üzere mesfûrân Ahsakya ve Avram Yahûdilere tenbîh olundukda onlar dahi fîmâ-ba‘d yorgancılara mahsûs emti‘ayı ve döğülmüş ve kalb yapağı bey‘ etmemek üzere ta‘ahhüd eylediklerinde mezbûrûn dahi râzılar olup bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 21 min-Rebî‘ülâhir sene 1163