Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 558 Hüküm no: 770 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerağî Hasan mahallesinden Hamza’nın arsası üzerine eve yapmasının hiçbir mahzuru olmadığını mahalle ahalisinin beyan ettikleri Bâ-mühr-i hazret-i efendi Ma‘rûz Derûn-ı arzuhâlde mezkûr arsanın keşfi için cânib-i şer‘den irsâl olunan İbrahim Efendi dâ‘îleri İstanbul’da Koca Mustafa Paşa kurbünde Çerâğī Hasan mahallesinde vâki‘ sahib-i arzuhâl Hamza’nın ma‘lûmü’l-hudûd arsa-i mezkûresine varıp keşif ve mu‘âyene eylediğinde sahib-i arzuhâl mezbûr Hamza mülkü olan arsa-i mezkûresi üzerine duvar ile herbirinin mahâllini ta‘yîn ve tahsîs edip binâsına henüz mübâşeret etmediği on iki bâb müteehhilîn menâzili binâ olunduğu sûretde kat‘a kimesneye zarar-ı şer‘îsi yokdur belki hâlî arsa durmasından binâ olundukda mahallemizin ziyâde emniyetine bâ‘is olur deyü mahalle-i mezbûre imâmı el-Hâc Halil Efendi ve müezzinleri Molla Mehmed ve Molla Abdullah ve cerîdede mazbûtü’l-esâmî otuz nefer Müslimînin ihbâr eylediklerini mezbûr dâ‘îleri mahâllinde ketb ü tahrîr edip ba‘dehû ümenâ-i şer‘le meclis-i şer‘de inhâ ve takrîr eylediği huzûr-ı âlîlerine i‘lâm olundu bâkī emr [ü] fermân hazret-i veliyyü’l-emrindir. [Fî-] gurreti Cumâd[elâhire] sene 1163