Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 80 Hüküm no: 48 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlânâ Müstecab b. Kasım’ın Abdürrahim b. Şaban’da olan alacağını tahsil ettiği Vech-i tahrîr-i hurûf budur ki, Mevlânâ Müstecab b. Kāsım mahfil-i şer‘-i şerîfde sâhibü’l-kitâb Abdürrahim b. Şaban mahzarında ikrâr ve takrîr-i kelâm edip bundan akdem marîz olup mezkûr Abdürrahim bana hizmet ederken yanımda olan yüz beş sikke altınımı benim iznimsiz odama iletmek için alıp zâyi‘ etmeğin mezbûrdan meblağ-ı mezbûru taleb edip habs ettirmiş idim. Hâliyâ pâdişâh-ı âlem-penâh hazretlerinin sadakatından meblağ-ı mezbûr mezkûra ihsân olunup ben dahî meblağ-ı mezbûru bi’t-tamâm ve’l-kemâl mezkûr Abdürrahim yedinden bî-kusûr alıp kabz ettim. Mezkûr zimmetinde asla hakkım ve sebha-i hakkım kalmadı dedikde mukırr-ı mezbûru mukarrun-leh mezbûr cemî‘i ikrârihî tasdîk edicek mâ-vaka‘a bi’t-taleb kayd olundu. Şuhûdü’l-hâl: Hüseyin b. Ali, Mehmed Çelebi b. Süleyman, Ahmed b. Abdullah Mustafa, Timur b. Abdullah.