Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 121 Hüküm no: 144 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eksenos’un borcuna karşılık elkonulan evinin Boğdan voyvodası Aleksandra’ya satışı Mahmiye-i Kostantiniyye’de elân Beytülmâl-ı hâssa emîni olan Hızır Çelebi b. İlyas hâliyâ Boğdan Beyi olan Aleksandra nâm voyvodadan vech-i âtîye Yusuf b. Yunus ve Mustafa Bey b. Abdullah şehâdetleriyle vekâleti sâbit olan Nikola v. Pestelinik nâm zimmî mahzarında ikrâr ve takrîr-i kelâm edip mahmiye-i İstanbul darbhânesinde âmil olup mürd olan Eksinos nâm [zimmî] zimmetinde mîrî fülüs bahâsından on beş bin yedi yüz elli akçe deyni zâhir olup merkūm Eksenos mahmiye-i merkūmede Tercümân Yunus mahallesinde vâki‘ olan beş bâb hucurâtı müştemil menzilini iki tarafı mezbûr Aleksandra mülküne ve bir tarafı Merkite avret mülküne ve tarîk-i hâssa müntehîdir. Menzil-i mezkûr deyn-i mezbûr mukābelesinde mîrî için zabt olunmuş idi. Hâliyâ ol ev bey‘-i men yezîd olunup mefâhirü’l-emâcid ve’l-ekârim defterdâr efendiler ma‘rifetiyle işbu vekîl-i mezkûra müvekkili için on bin râyicü’l-vakt akçeye bey‘ edip semen-i mezbûru müvekkilim mâlından vekîl-i mezbûr elinden alıp kabz ettim dedikde mâ-vaka‘a gıbbe’t-tasdîk an kıbeli’l-vekîl tahrîr olundu. Fî 25 [Z]ilhicce [sene 964] Şuhûdü’l-hâl: Hasan Bey kethüdâ-i mehterân, Cafer Bey el-mehter, İbrahim Bey el-mehter.