Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 160 Hüküm no: 236 Orijinal metin no: [35a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hızır’ın çiftlik ve değirmen hissesini Beşaret Bey b. Hızır’a sattığı Hasan b. Hızır nâm kimesne meclis-i şer‘-i şerîfe gelip zübdetü’l-emâcid ve’l-ekârim Beşaret Bey b. Hızır nâm za‘îm mahzarında ikrâr ve takrîr-i kelâm edip Baba Saray tevâbi‘inde Ösek nâm karye sınırında vâki‘ olup inde’l-ahâlî ma‘lûm olmağla tahdîd ve ta‘yînden mustağnî olan çiftlik ve Zudimle suyu üzerinde dâyir olan tahdîdden ve ta‘yînden mustağnî olan değirmenin yedi hisseden üç hissesi ki babamdan bana ve üç kız karındaşıma irs-i şer‘iyle intikāl eylemişdir hâliyâ zikr olunan çiftlikden ve değirmenin üç hissesinden humsân hisse-i şâyi‘imi işbu hâmil-i kitâb mezkûr Beşaret Bey’e iki bin akçeye bey‘ edip semenini bî-kusûr alıp kabz eyledim dedikde mukırr-ı mezbûru mezkûr Beşaret Bey bi’l-müvâcehe tasdîk edip mâ-vaka‘a bi’t-taleb kayd olundu. Şuhûdü’l-hâl: Mustafa Çelebi b. Koçi Bey, Nasûh Bey b. Abdullah, İnehan Bey b. Abdullah.