Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 163 Hüküm no: 243 Orijinal metin no: [36a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Altun bt. Hasan’ın, terekesi Beytülmâl tarafından zabt edilen kocası Mehmed b. Abdullah’ta mehr-i müeccelden alacağı olduğu Hamza b. Abdullah el-kilârî ve Mehmed b. Mahmud el-kilârî nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, Altun bt. Hasan’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘iye-i merkūmenin, bundan akdem mahrûse-i Edirne mahallâtından Ferid Bey mahallesinde fevt olan ve muhallefâtı Beytülmâl-i mezbûr tarafından zabt edilen ve öldüğünde taht-ı nikâhında bulunduğu Mehmed b. Abdullah nâm zevcinin zimmetinde mehr-i müecceli cihetinden dört yüz akçe hakkı vardır. Verâseti mezbûre Altun’a ve müteveffâ-yı mesfûrun erkek kardeşi Mahmud b. Abdullah’a münhasırdır. Onlardan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim, müdde‘iye-i mezbûreye meblağ-ı mezkûru almadığına, hibe etmediğine, havâle etmediğine, bi-vechin mine’l-vücûh ve sebebin mine’l-esbâb hakkının kısmen veya tamâmen sâkıt olmadığına dâir yemîn verip meblağ-ı merkūmun edâsına hükmetti. Cerâ zâlike ve hurrire fî 13 Rebî‘ülâhir sene 965 Şuhûdü’l-hâl: Cafer b. Tursun, Mehmed b. Ahmed, Ahmed b. Mahmud