Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 171 Hüküm no: 261 Orijinal metin no: [38a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sitti bt. Abdullah’ın, terekesi Beytülmâl tarafından zabt edilen kocası Süleyman b. Abdullah’ta mehr-i müeccel alacağı olduğu Mustafa b. Bâli ve Kemal b. Fazlullah ve Nazar b. Abdullah nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, Sitti bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘iye-i mezkûrenin, bundan akdem mahrûse-i kazâ-yı Edirne tevâbi‘inden Sabuncu karyesinde fevt olan ve muhallefâtı Beytülmâl-i mezbûr tarafından zabt edilen Süleyman b. Abdullah nâm zevcinin zimmetinde mehr-i müecceli cihetinden bin akçe hakkı vardır. Verâseti ona münhasırdır. Ondan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim, müdde‘iye-i mezbûreye meblağ-ı merkūmu kısmen veya tamâmen almadığına, hibe etmediğine, havâle etmediğine, bi-vechin mine’l-vücûh hakkının sâkıt olmadığına dâir yemîn verdikten sonra şehâdetleri mûcebince hükmetti. Cerâ zâlike ve hurrire fî 27 Rebî‘ülâhir sene 965 Şuhûdü’l-hâl: Hasan b. Rûşen, Ali b. İbrahim ve Bâli Bey b. İbrahim