Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 229 Hüküm no: 392 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancıbaşı Osman Ağa b. Abdullah Evkafı’na mütevellî olan Halil Dede b. Mahmud’un takririyle vakıf zararına olan satışın iptali Mahmiye-i İstanbul’da Bostancıbaşı merhûm Osman Ağa b. Abdullah Evkāfı’na hâliyâ mütevellî olan Halil Dede b. Mahmûd meclis-i şer‘de takrîr-i kelâm edip mütevellîsi olduğum evkāf-ı mezbûreden mahmiye-i mezbûrede merhûm Hobyâr Mahallesi’nde ve Mebrûre Şehzâde Sultân Mehmed tâbe serâhu vâlidesi câmi‘i kurbünde vâki‘ olup bir tarafından emîn-i beytü’l-mâl Mehmed Çelebi ve Ali b. Mehmed mülkü ile ve bir tarafından Takyacı Ali mülkü ile ve bir tarafından Şaban mülkü ile ve bir tarafından Yeniçeri Ömer mülkü ile bir tarafından Kaya Halîfe mülkü ile ve bir tarafından tarîk-i âmla mahdûd olan yerin üzerinde olan nukzun vakf içün Mevlânâ Nureddin bin Gubârî sâbıkā mütevellî olan Pîr Mehmed b. Seydâ nâm kimesneye bin iki yüz akçeye gabn-ı fâhiş ile bey‘ edip vakfa gadr etmişdir hâliyâ feshin taleb ederin dedikde mezkûr Mevlânâ Nûreddin b. Gubârî kıbelinden bi-mâ hüve tarîkü’s-sübût şer‘an bey‘-i mezbûrun vekâlet-i mutlakası sâbit olan Osman b. Mehmed’den suâl olundukda semen-i mislidir gabn yokdur deyü inkâr edicek mezbûr Halil Dede’nin sıdk-ı makāline mutâbık beyyine taleb olundukda ehl-i vukūf ve âdil müslimînden el-Hâc Mehmed b. Ömer ve’l-Hâc Mehmed b. Ahmed ve el-Hoca Kāsım b. Abdullah ve Hüseyin b. Sadullah ve el-Hâc Abdurrahman nâm kimesneler zikr olunan nukzun kıymeti altı bin akçe idi. Mütevellî-i mezbûr gabn-ı fâhiş ile bey‘ etdi deyü edâ’-i şehâdet etdiklerinde mezkûr bey‘in feshine hükm olundu. Fî 10 Receb sene 965. Şuhûdü’l-hâl: Mevlânâ Hasan b. Yûsuf, Gāzî Halîfe b. Mehmed, Sinan Hammâmî, Abdi b. Pîr Ferîd, Haydar Halîfe el-İmâm.