Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 79 Hüküm no: 50 Orijinal metin no: [9b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhallefâtı zapt edilen Hürrem Ağa b. Abdullah’ın davacı Bevvâb Hasan b. Ferhad’a on üç bin akçe vasiyet ettiği Bevvâb Mehmed b. Abdullah ve Pîrî b. Abdullah nâm kimesneler, fahrü’l-emâsil ve’l-akrân müdde‘â aleyh Bostancıbaşı Davud Ağa b. Abdülmennân kıbelinden istimâ‘-ı da‘vâya vekâleti ve âti’z-zikr olan müteveffâ-yı mezbûrun muhallefâtını zapta vasiyy-i muhtâr olarak vesâyeti bimâ hüve tarîki’s-sübût şer‘an sâbit olan Mevlânâ Ali b. Mehmed mahzarında, Bevvâb Hasan b. Ferhad’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müteveffâ Hürrem Ağa b. Abdullah, Atebe-i aliyye’de bostancıbaşı iken müdde‘î-i mezbûra râyicü’l-vakt on üç bin akçe vasiyyet edip vasiyyeti üzre mukırr ve musırr olarak vefât etti. Şehâdetleri ba‘de’t-ta‘dîli’ş-şer‘î ve’t-tezkiyeti’ş-şer‘iyye inde’ş-şer‘ mu‘teber ve makbûl oldukdan sonra mûcebince hükmedildi. Cerâ zâlike ve hurrire fî evâsıtı Cumâdelûlâ sene 970. Şuhûdü’l-hâl: Hidâyetullah b. Şeyh Kasım el-müezzin, Mustafa b. Abdullah es-sipâhi, Sinan Halîfe b. Ahmed, Hasan Halîfe b. Ali el-imâm, Sinan Bey b. Abdullah es-sipâhi Müdde‘î-i mezbûr sonra cemî‘ meblağ-ı mezbûru vasiyy-i mezbûr yedinden tâm ve kâmil olarak ahz u kabz ettiğini ikrâr etti. Vasiyy-i mezbûr, mukırr-ı mezbûru vicâhen ve şifâhen tasdîk etti. Cerâ zâlike ve hurrire fi’l-mezbûr. Şuhûdü’l-hâl: Şuhûd a‘lâhu