Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 82 Hüküm no: 57 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir arsanın satışı ile ilgili gabn-ı fahiş davasında sulh olunması Ayşe Hâtun bt. Mahmud nâm hâtun bu meclis-i şer‘-i şerîf ve mahfil-i dîn-i münîfde Ali Bey b. Abdullah nâm silahdâr mahzarında ikrâr ve takrîr-i merâm edip bundan [akdem] İstanbul’da Soğanağa mahallesinde vâki‘ olup tûlen ve arzan 350 zira‘ olup bir cânibinden benim mülküm ile ve bir tarafından Kamer bt. Abdullah ve bir tarafı tarîk-i hâs ve bir tarafı tarîk-i âm ile mahdûd olan arz-ı hâliyeyi yedi bin akçeye sâbıkan bey‘ edip kabz-ı semen ettiğimden sonra zikr olunan bey‘ gabn-i fâhiş tarîkiyle olmuşdur deyû da‘vâ ve nizâ‘ eylemeğin mâbeynimizde münâza‘ât ve muhâsamât etmiş idik. Hâlâ ibrâ-i âti’z-zikr mukābelesinde mezbûr Ali Bey’den üç bin üç yüz akçe alıp kabz edip mezbûr Ali Bey’in zimmetini cemî‘ da‘vâdan ve eymân ve muhâsamâtdan umûmen, husûsen arz-ı mezbûreye müte‘allik da‘vâdan ibrâ-ı âm ile ibrâ ve iskāt eyledim dedikde mukırra-ı mezbûreyi mezbûr Ali Bey bi’l-muvâcehe tasdîk ve ibrâsını kabûl edicek mâ vaka‘a bi’t-taleb kayd olundu. Tahrîren fî evâhiri Cumâdelûlâ sene 970. Şuhûdü’l-hâl: Mevlânâ Mehmed b. Hamdullah el-imâm, Hüseyin b. Sinan, Ali b. Abdullah, Hüsrev b. Abdullah, Mustafa b. Karagöz, Cafer b. Abdullah, Mustafa b. Abdullah, Bilal b. Abdullah