Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 104 Hüküm no: 103 Orijinal metin no: [19b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhallefâtından bir miktar akçesi zapt edilen Mustafa b. Abdullah’ın terekesinin üçte birini hayır işlerine ve para vakfına tahsisini vasiyet ettiği Aşçı el-Hâc Mustafa b. Abdullah, imâm Sıyami b. Resûl ve Sinan b. Abdullah nâm kimesneler Dîvân’da akdedilen meclis-i şer‘-i şerîfte hâkim-i muvakki‘ huzûrunda mahmiye-i Kostantıniyye’de vâki‘ Beytülmâl-i hâs emîni Mustafa Çelebi b. Behmen ve kâtibi Derviş Çelebi b. Lütfi mahzarında, âti’z-zikr olan müteveffâ-yı merhûmun vasiyyetlerini tenfîze vasiyy-i muhtâr olduğu bimâ hüve tarîki’s-sübût şer‘an sâbit olan Silahdâr Hüsrev Bey b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, mahmiye-i merkūme mahallâtından Sinan Ağa mahallesinde mütemekkin olup bundan akdem vefât eden ve muhallefâtından zeyilde mezkûr senenin Cumâdelûlâ ayında yirmi sekiz bin iki yüz kırk akçesi Beytülmâl-i mezkûr tarafından zapt edilen tabbâhîn-i hâssadan merhûm Mustafa b. Abdullah, muhallefâtından sülüsünden vakıf kurulması ve hayır ve hasenâta harcanması için vasiyyette bulundu ve vasiyyetini vasiyy-i mezbûra tefvîz etti. Vasiyy-i mezbûr da vasiyet mûcebince hayır cihetine sarfetti ve vâkıf-ı mezbûrun irâdesine uyarak kalan mikdârı vakfetti. Vasiyy-i merkūm, üç bin akçeyi müteveffânın techîz ve tekfînine ve eyyâm-ı mu‘tâdede tabh-ı ta‘âma sarf etti. Vakfettiği mikdâr da altı bin akçe oldu. Meblağ-ı mezbûrun senede ona on bir rıbh üzre istiğlâl ve istirbâh edilmesini şart etti. Rıbhdan hâsıl olan mikdârdan yevmî bir akçenin Kur’ân-ı kerîm ve furkān-ı azîmden istediği bir yerde ve istediği bir zamânda günde bir cüz’ okuyan kimesneye ta‘yîn etti. Tilâveti de yaşadığı sürece Ahmed b. Hayreddin’e sonra hâkimin ihtiyâr edeceği kimesneye şart etti. Her sene iki yüz kırk akçeyi vakıf mütevellîsine ta‘yîn etti. Vakıf muamelesi nehc-i mer‘î üzre böyle cereyân ettiğinde hâkim-i mûmâ ileyh bu mevzûdaki eimme-i eslâf beynindeki ihtilâfı da bilerek vakfın sıhhat ve lüzûmuna hükmetti. Cerâ zâlike ve hurrire fî evâhiri Cumâdelâhire sene 970. Şuhûdü’l-hâl: Abdülkādir b. Yusuf, Ahmed b. Süleyman el-kâtib, Kasım b. Abdullah el-müezzin, Abdi Çelebi b. Haydar es-sipâhi, Mehmed Çelebi b. Süleyman el-kâtib, Abdi b. Ahmed, İbrahim b. Mustafa, Ahmed b. Mustafa, Nasûh Bey b. Abdullah ve gayruhüm mine’l-hâzırîn