Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 139 Hüküm no: 167 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhad Paşa b. Abdülmennân’ın At Meydanı’ndaki evini Veziriazam Rüstem Paşa’nın kızı Ayşe Sultan’a on iki bin altına sattığı Sebeb-i tahrîr-i kitâb-ı şer‘î ve mûcib-i tasdîr-i hitâb-i mer‘î budur ki, düstûr-i mükerrem müşîr-i müfahham nizâm-ı âlem müdebbir-i cumhûri’l-enâm bi’l-fikri’s-sâkıb mütimm-i mühimmâtü’l-enâm bi’r-re’yi’s-sâ’ib sâhibü’n-nefsi’l-kudsiyye ve’l-kemâlâti’l-ünsiyye ve’s-sa‘âdâti’l-aliyye ve’s-siyâdâti’l-behiyye el-mahfûf bi sunûfi avâtıfı’l-meliki’l-mennân Hazret-i Ferhad Paşa b. Abdülmennân kıbelinden âti’z-zikr olan bey‘a ve kabz-ı semene ikrâra umdetü’l-imtisâl ve’l-akrân İbrahim Çavuş b. Kemal ve umdetü’l-ekâbir ve’l-a‘yân Yakub Çelebi b. Üveys nâm kimesneler şehâdetleriyle vekâleti sâbit olan kıdvetü’l-emâcid ve’l-ekârim zübdetü’l-ekâbir ve’l-efâhim erbâbü’l-ızzeti’l-aliyye eshâbü’l-ıdeti’l-behiyye el-muhtas bi inâyeti’l-melik el-ilâh vezîr-i mûmâ ileyhin kethüdâları olan Mustafa Kethüdâ b. Abdullah meclis-i şer‘-i şerîf ve mahfil-i dîn-i münîfde zerretü iklîli’l-azameti ve’l-celâl gurretü cebîni’s-sa‘âdeti ve’l-ikbâl meliketü’l-melikât aliyyetü’z-zât safiyyetü’s-sıfât zâtü’l-aliyyi ve’s-sa‘âdât sülâletü’s-selâtîni’l-izâm neticetü’l-havâkini’l-fihâm el-mahfûfe bi sunûfi avâtıfı’l-meliki’l-mennân Ayşe Sultan bt. el-vezîri’l-a‘zami’l-ekrem ve’l-müşîri’l-emcedi’l-efham râfi‘-ı a‘lâmi’l-adl ve’l-insâf dâfi‘-i zulâmi’z-zulm ve’l-i‘tisâf ed-dâric ilâ rahmeti’l-meliki’l-a‘lâ el-ma‘fûru-leh es-sa‘îd eş-şehîr Hazreti Rüstem Paşa ebbede’llahu devletehû ve ızzetehâ ilâ kıyâmi’s-sa‘â ve sâ‘ati’l-kıyâm ve nevvere merkade ebîhâ mâ tevâli’l-leyâlî ve’l-eyyâm hazretleri kıbelinden bimâ hüve tarîki’s-subût şer‘an vekâlet-i mutlakası sâbit olan umdetü’l-ekâbir ve’l-a‘yân makbûlü’s-sudûr ve’l-erkân zü’l-kadri’r-refî‘ ve’l-câhi’l-menî‘ el-mahsûs bi inâyeti’l-meliki’l-müste‘ân Behrâm Kethüdâ b. Abdülmennân kıbelinden âti’z-zikr olan husûsa filan ve filan şehâdetleriyle vekâleti sâbit olan Mehmed Bey b. Abdülhay mahzarında ikrâr ve takrîr-i merâm edip İstanbul’da At Meydanı kurbunda Uzun Şuca‘ mahallesinde vâki‘ olup kıblesi At Meydanı ile ve üç cânibi tarîk-i âmla mahdûd olan evleri müvekkilim Paşa-i mûmâ ileyh mezbûr Behrâm Kethüdâ’ya on iki bin altına bey‘ edip ol dahi müvekkile-i merkūmesi için semen-i mezbûr ile iştirâ ettikden sonra mezbûr Behrâm Kethüdâ yedinden semen-i mezbûru bî-kusûr alıp kabz eyledim dedikde mukırr-ı mezbûru mezbûr Mehmed Bey bi’l-muvâcehe tasdîk edicek mâ vaka‘a bi’t-taleb kayd olundu. Tahrîren fî 12 Şa‘bân sene 970. Şuhûdü’l-hâl: Ahmed Çelebi b. Şuca‘ Çavuş, Çavuş Seydi Ali b. Bâli, Mütevellî Mehmed b. Abdullah, Emrullah b. Sinan, İbrahim Bey b. Mehmed, Süleyman Halîfe b. Abdullah, Hamza Ağa b. Abdullah kilercibaşı, İsa b. Mustafa ve gayruhüm