Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 147 Hüküm no: 182 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan ve Neslihan adlı müvekkilelerin babaları Yusufşâh Bey’in vefat ettiği ve muhallefâtına dâir İsmihân ve Neslihan bt. Yusufşâh ve Peyker nâm hâtunlar kıbelinden husûs-ı âtîye bimâ hüve tarîki’s-sübût şer‘an vekâleti sâbit olan fahrü’l-akrân Mehmed Bey b. Mahmud meclis-i şer‘-i şerîf ve mahfil-i dîn-i münîfde Neslişâh bt. Mesih Bey kıbelinden ve âti’z-zikr olan husûsa Hüsrev Bey b. Abdullah ez-za‘îm ve Kaytas b. Veli nâm kimesneler şehâdetleriyle vekâleti sâbit olan Mevlânâ Süleyman Bey, Veli nâm kimesne ve mezbûre Nesli Hâtun’un karındaşı olan Yahya Bey b. Mesih Bey mahzarında takrîr-i da‘vâ edip bundan akdem mezbûretân İsmihân ve Neslihan nâm müvekkilelerinin babaları Yusufşâh Bey fevt oldukdan mezbûr Yusufşâh Bey’in vâlidesi Aynî Sultan kıbel-i şer‘den vasî olup otuz altı bin akçelerine vâlidesi Aynî Sultan vâzı‘atü’l-yed olup mezbûre Aynî Sultan dahi fevt olup muhallefâtını mezbûr Yahya Bey ve Neslihan zabt eyleyip mezbûre Aynî Sultan[’ın] cemî‘ muhallefâtı deynine vefâ etmeyip taksîm-i guremâ olundukda dokuz bin akçe mezbûretân müvekkilelere taksîm-i guremâdan hisse düşüp mezbûre Aynî Sultan’ın kasaba-i Ebâ Eyyûb’de Çavuş mahallesinde vâki‘ olup bir tarafından tarîk-i âm ve bir tarafından zâviye ile ve iki tarafından vakıf bostan ile mahdûd olan evi zuhûr edilip hâlâ müvekkilelerinin deynleri için zikr olunan evi Aynî Sultan’ındır deyû mezbûr Yahya Bey ve Mevlânâ Süleyman sâbıkan olan mezbûr Aynî Sultan’ın mezbûretân müvekkilelere deyni var idiğin inkâr edip zikr olunan dokuz bin akçeyi dahi terahhümen verdik asla Aynî Sultan’ın mezbûretâna deyni yoktur deyip Aynî Sultan’ın mezbûretân müvekkillere deyni (…) idüğü inkâr edicek müdde‘î-i mezbûrdan beyyine taleb olundukda beyyinem hâzır değildir yemîn verilsin deyû mezbûr Yahya Bey’e yemîn teklif olundukda yemînden nükûl edip ben ferâgat ettim dediği mezbûr müdde‘î talebi ile kayd olundu. Şuhûdü’l-hâl: Ahmed b. Süleyman, Mehmed Çelebi b. Süleyman, Nasûh Bey b. Abdullah ve gayruhüm mine’l-hâzırîn