Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 160 Hüküm no: 204 Orijinal metin no: [39b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hânî bt. Bekir’in, muhallefâtı zapt edilen Nasûh b. Mustafa’nın teyzesi ve vârisi olduğu Mehmed b. el-Hâc Eymir ve el-Hâc Derviş b. Mehmed nâm kimesneler, Dârü’s-saltanat mahmiye-i Kostantıniyye’de vâki‘ Sultan-ı a‘zam Bîmâristânı’nda vekîl-i harc olan Mustafa b. Musa mahzarında, Sofya kasabası mahallâtından Emre mahallesinden Hânî bt. Bekir’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müdde‘iyye-i mezbûre, mahalle-i mezbûre sükkânından olup Bîmâristân-ı mezbûr’da bundan akdem vefât eden ve muhallefâtından tülbent, çuka ve kebesi vekîl-i harc-ı mezbûr yediyle zapt edilen Nasûh b. Mustafa’nın vârisidir. Zira müdde‘iyye-i mezbûre, müteveffâ-yı mezbûrun teyzesidir. Annesi Zeyneb b. Bekir, müdde‘iyye-i mezbûrenin ana-baba bir kardeşidir. Verâseti ana münhasırdır. Andan başka vârisi ma‘lûmumuz değildir. Şehâdetleri ba‘de şerâiti’l-kabûl inde’ş-şer‘ mu‘teber ve makbûl oldukdan sonra mûcebince hükmedildi. Sonra muhallefât-ı müteveffâ-yı merhûmun tamâmını ahz u kabz ettiğini ikrâr etti. Vekîl-i harc-i mezbûr, vâki‘ ikrârı tasdîk etti. Cerâ fî Ramazan. Şuhûdü’l-hâl: Musa b. Tâceddin, Cafer b. Hüseyin el-imâm, Mustafa b. Ali Çelebi, Osman b. Şeref el-imâm