Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 182 Hüküm no: 248 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed oğlu Süleyman Şah Bey’in eşi Mihrihan Hatun’a mehir hakkı için bazı emlâk ve arazinin tasarruf hakkının verilmesi Oldur ki, merhûm Süleyman Şah Bey b. el-merhûm Mehmed Bey’in oğulları umdetü’l-emâsil ve’l-akrân Mehmed Bey ve Ali Bey ve Arif Bey nâm kimesneler ve merhûm-ı mezbûrun sulbiye kızı Neslihan hâtun kıbelinden husûs-ı âtîye Cevher Ağa b. Abdullah ve Keyvan Bey b. Abdullah nâm kimesneler şehâdetleriyle vekâleti sâbit olan fahrü’l-a‘yân Ahmed Bey b. Abdurrahman nâm zevât meclis-i şer‘-i şerîfe hâzırûn olup merhûm-ı mezbûrun zevcesi ve mezbûrûn Mehmed Bey ve Ali Bey ve Arif Bey’in ve Neslihan Hâtun’un vâlidesi olan fahrü’l-muhadderât Mihrihan Hâtun bt. Ahmed Bey kıbelinden husûs-ı âtîye şâhidin-i merkūmîn şehâdetleriyle vekâleti sâbit olan Mevlânâ Tâceddin b. Ramazan nâm kimesne mahzarında merkūmun Mehmed Bey ve Ali Bey ve Arif Bey asâleten ve merkūm Ahmed Beyin müvekkile-i merkūmesi kıbelinden vekâleten ikrâr ve itirâf edip bundan akdem mezbûr Süleyman Şah Bey fevt oldukda mezbûre zevcesi Mihrihan Hâtun’a mehr-i müeccel üç bin akçe deyni olup hâlâ sâlifü’z-zikr üç bin altın deyne tuta merhûm-ı mezbûr Süleyman Şah Bey’in muhallefâtından kasaba-i Narda’da vâki‘ olup dört tarafında tarîk-i âm ile mahdûd olan sarayını ve kasaba-i mezbûrede vâki‘ olup iki tarafdan tarîk-i âm ve bir tarafdan merhûm Fâik Paşa câmi‘i ve medresesi ile ve bir tarafdan dere ile mahdûd olan bahçe içinde olan evleri ve ahırları ve eşcâr-ı müsmiresi ve gayr-i müsmiresi ile ve kasaba-i merkūmede vâki‘ olup dört tarafdan tarîk-i âm ile mahdûd bir köhne saray içinde olan cemî‘ müştemilâtı ile ve kasaba-i mezbûre kazâsında Ayanikola demekle ma‘rûf tahdîdden ganî olan çayırların ve tarlaların hakk-ı tasarrufların ve kazâ-i mezbûr tevâbi‘inden Salavere demekle ma‘rûf olup sâhibine intimâ ile ma‘rûf ve meşhûr olmağın tahdîd ve ta‘yînden ganî olan çiftliği içinde olan damı ile ve sâir âlât-ı zirâ‘at ve hırâseti ve davarları ve kısrakları ile ve bi’l-cümle mezbûr zikr olunan çiftlikde temlîk ve temellüke kābil olanın cem‘îsini ve merkūm çiftliğe tâbi‘ olan tarlaların ve çayırların ve koruların ve ormanların hakk-ı tasarruflarını ve kazâ-i mezbûr tevâbi‘inden Garamençe nâm mevzi‘de olup sâhibine intisâbla meşhûr olmağın tahdîdden ganî olan yirmi dönüm bağı ve kasaba-i mezbûre suyu geçidinde olan mülk gemiyi ve gemi bağlanacak yerin hakk-ı tasarrufun ve bunlardan mâ‘adâ Karlıili sancağında Ayamavra kadılığında vâki‘ olup sâhibine intimâ’la ma‘rûf olmağın tahdîdden müstağnî olan iki göz köhne değirmenleri ve mezbûr değirmenler kurbunda bir kıt‘a çayırın hakk-ı tasarrufun cemî‘ tevâbi‘ ve levâhıkları ile ve âmme-i menâfi‘ ve mürâfıkları ile mezbûre Mihrihan Hâtun’a verdik ol dahi deyn-i mezbûra tuta zikr olunan eşyâyı kabûl eyledi dediklerinde mukırrûn-ı mezbûrûnu mezbûr Mevlânâ Tâceddin bi’l-muvâcehe tasdîk edicek mâ-vaka‘a bi’t-taleb kayd olundu. Derkenâr: Vokoporane nâm çiftliği içinde olan damı ile ve sâir devvâb ve esbâb harası ile zikr olunan çiftliğe tâbi‘ koruların ve çayırların ve zirâ‘ata sâlih tarlaların hakk-ı tasarrufların sah. Fî 6 Şevvâl sene 970. Şuhûdü’l-hâl: Kasım Bey b. Abdullah emîr-i alay, Mustafa b. …? çavuş-ı alay, Hüseyin Bey b. Hasan, Mustafa b. Bâli, Hüseyin b. Abdullah, Hüseyin Bey b. Abdullah ve gayruhüm