Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 195 Hüküm no: 272 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cezayir beylerbeyi iken vefat eden Ahmed Paşa’nın muhallefâtından kızı Rahime ile oğlu Ali’nin alacakları miras payına dâir Sebeb-i tahrîr-i hurûf oldur ki, Bundan akdem Cezâyir beylerbeyisi iken fevt olan merhûm Ahmed Paşa’nın muhallefâtını zabta vasiyy-i muhtârı olup Haydar Bey b. Abdullah mahzarında merhûm-ı mezbûrun oğlu Ali ve kızı Rahime nâm sagīrlere kıbel-i şer‘den vasî olup ve merhûm-ı mezbûrun karındaşı olan fahrü’l-akrân Hasan Ağa b. el-Hâc Mehmed nâm kimesne meclis-i şer‘-i şerîf ve mahfil-i dîn-i münîfde ikrâr ve takrîr-i merâm edip mezbûr karındaşım Ahmed Paşa Cezâyir’de fevt olup merhûm-ı mezbûrun vilâyet-i Cezâyir’de ve Rum’da vâki‘ cemî‘ muhallefâtından vasiyy-i mezbûr bahâya tutulan esbâbı ve akārı ve hâzır bulunan ve satılan emlâk bahâsıyla nukūduyla cem‘an otuz sekiz kere yüz bin ve sekiz bin iki yüz sekiz akçesin zabt edip zikr olunan meblağdan on beş kere yüz bin ve doksan altı bin yüz altmış altı akçe verilip merhûm-ı mezbûrun mîrîye ve gayra olan düyûn-ı müteferrikasına verilip ve doksan iki bin yetmiş üç akçesi merhûm-ı mezbûr sülüs-ı malından ve vesâyâsını tenfîz etmekle ba‘zı mesârife sarf eyleyip ve bunlardan bâkī kalan mâldan yirmi bin altmış akçeyi resm-i kısmet için verip beyne’l-verese on dört kere yüz bin ve elli üç bin dokuz yüz otuz beş akçe bâkī kalıp zikr olunan meblağdan vasîsi olduğum mezbûr Ali nâm sagīrin hissesi sekiz kere yüz bin ve yedi bin beş yüz yetmiş altı akçe olur zikr olunan hisseden yüz elli üç bin dört yüz yetmiş üç akçesin hâne bahâsından ve sâir esbâb bahâsından altı yüz elli dört bin yüz üç akçesin nakid mezbûr vasî yedinden alıp kabz eyledim ve zikr olunan meblağdan sagīre-i mezbûrenin hissesin ve dört kere yüz bin ve üç bin yedi yüz seksen yedi akçe olup zikr olunan sagīre hissesinin dahi doksan dört bin dokuz yüz beş akçesini hânesinden ve gayrı emlâk ve esbâb bahâsından alıp kabz eyleyip ve üç kere yüz bin ve sekiz bin sekiz yüz seksen iki akçesin nakid mezbûr vasînin yedinden bî-kusûr alıp kabz eyledim dedikde mukırr-ı mezbûru, mezbûr Haydar Bey bi’l-muvâcehe tasdîk edicek mâ-vaka‘a bi’t-taleb kayd olundu. Fî 18 Şevvâl sene 970. Şuhûdü’l-hâl: Mevlânâ Abdurrahim Çelebi b. Ömer el-müderris, Ahmed Çelebi b. Mahmud, Nasûh Bey b. Abdullah, el-Hâc Mehmed b. Hüseyin, Ahmed Çelebi b. Mehmed kâtib-i dîvân, Mehmed Çelebi b. Süleyman, Hüseyin b. Ali, Abdi Çelebi es-sahhâf ve gayruhüm