Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 204 Hüküm no: 290 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza b. Abdullah ile zifâftan önce boşadığı eşi Ayşe bt. İlyas arasında başlık ve mehir konusundaki dava Hamza b. Abdullah nâm sipâhi, Ayşe bt. İlyas nâm hâtun kıbelinden Mehmed b. İskender ve Hamza b. Abdullah nâm kimesneler şehâdetleriyle vekâleti sâbit olan mezbûre Ayşe’nin babasını meclis-i şer‘a ihzâr ve mahzarında takrîr-i da‘vâ [edip] bundan akdem mezbûre Ayşe’ye tezevvüc edip kable’d-duhûl talâk verip üç bin akçe ağırlık vermiş idim hâlâ taleb ederim dedikde gıbbe’s-suâl mezbûr İlyas fi’l-vâki‘ zikr olunan mikdâr ağırlık ve bin akçe mehr-i müeccel ile nikâh etmiş idi lâkin ba‘de’t-talâk ol üç bin akçeden bin iki yüz akçe ve beş yüz mehr-i müeccelden ferâgat edip musâlaha eyledik dedikde gıbbe’s-suâl musâlaha[yı] inkâr edip on filori aldığın ikrâr edip mezkûr İlyas’dan beyyine taleb olundukda mezbûr müdde‘î beyyine ibrâz edip tezkiye olunup hükm olunmak sadedinde iken mezbûr Hamza sulha itirâf edip beni aldattılar almamış idim ancak on filori aldım gayrı almadım dedikde mezbûr İlyas’a mezbûr Hamza ikrârında kâzib değil idüğüne yemîn verilip mâ-vaka‘a bi’t-taleb kayd olundu. Hurrire fî 27 Şevvâl sene 970. Şuhûdü’l-hâl: El-Hâc İbrahim, Mehmed b. Ahmed, Mehmed b. Hasan, Mehmed b. İskender, Ali b. Murad, İbrahim b. Mustafa, Mustafa b. Sinan, el-Hâc Hamza b. Abdullah