Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 223 Hüküm no: 328 Orijinal metin no: [60a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Leccun beyi Sinan’ın Şah Hûbân bt. Abdurrahman Vakfı’na olan borcunun tahsil edildiği Kendi evkāfına bi’l-fi‘il mütevellîye olan fahrü’l-havâtîni’l-muhadderât ve zahru’n-nisvâni’l-muvakkarât Şah Hûbân Hâtun bt. Abdurrahman kıbel[inden] husûs-ı âtîyi ikrâra vekîl ve mezbûre hâtunun kāimmakāmı olup vekâleti Hacı Cafer b. Abdullah ve Hamza b. Abdullah nâm kimesneler şehâdetleriyle sâbit olan marziyyü’l-halk ve makbûlü’n-nâs Hüseyin Çelebi b. İlyas nâm kimesne meclis-i şer‘-i şerîf ve mahfil-i dîn-i münîfde umdetü’l-ümerâ’i’l-kirâm zübdetü’l-küberâi’l-fihâm sâbıkan Leccun Beyi olan Sinan Bey b. Abdullah kıbelinden ve zevcesi Fâtıma Hâtun bt. Ali kıbelinden tasdîk-i âti’z-zikr ve gayrı husûsa İsmail b. Mahmud ve Abdurrahman b. Hüseyin ve Ahmed b. Ali şehâdetleriyle vekâleti sâbit olan Yusuf b. Abdullah mahzarında ikrâr ve takrîr-i merâm edip mîr-i mûmâ-ileyh zimmetinde evkāf-ı mezbûre malından beş bin filori karz-ı şer‘îden ve altı yüz otuz sekiz filori mahmiye-i İstanbul’da Küçük Hacı mahallesinde vâki‘ olup bir tarafından Bâli Bey b. Abdullah nâm habbâz-ı Sultanî vekîli ile ve bir tarafından dahi mezbûr Küçük Hacı vakfı ile ve bir tarafdan Hoca Dursun vakfı ile ve iki tarafdan tarîk-i âm ile mahdûd olan vakf-ı mezbûr mâlı ile iştirâ olunmuş ev ücretinden cem‘an mîr-i mezbûrun zimmetinde beş bin altı yüz otuz sekiz filori olup zikr [olunan] filoriden hâlâ Haleb defterdârı olan ve mütevellîye-i merkūmenin sâlifü’z-zikr olunan malını kabza vekîl olan umdetü’l-ekâbîr ve’l-a‘yân Derviş Çelebi yedinden târihi kitâb sene-i Şa‘bânı’nda gelip vâsıl olup kabz eyledim ve bâz? ve dört bin otuz sekiz altın dahi hâlâ vekîl-i mezbûr yedinden alıp kabz eyledim ve iki filori dahi mîr-i mûmâ-ileyhin zevci olan Fâtıma Hâtun bt. Ali Çelebi’nin mahmiye-i İstanbul’da olan emlâkları ücretinden alıp kabz eyledim ve bi’l-cümle deyn-i mezbûru vekîl-i merkūm yedinden tarîk-i meşrûh üzre bî-kusûr velâ küsûr alıp kabz eyledim meblağ-ı mezbûrdan mezkûr bey zimmetinde bir habbe bâkī kalmadı dedikde mukırr-ı mezbûru mezkûr vekîl bi’l-muvâcehe tasdîk edicek mâ-vaka‘a bi’t-taleb kayd olundu. Tahrîren fî 12 Zilka‘de 970. Şuhûdü’l-hâl: Şühûd-ı-a‘lâhu