Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 226 Hüküm no: 334 Orijinal metin no: [61a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Ali Çelebi’nin, üç dükkânını Mevlânâ Abdurrahim b. Mehmed’e satması için Yusuf b. Abdullah’ı vekil ettiği Yusuf b. Abdullah, za‘îm Abdi b. Evrenos kıbelinden husûs-i âti’z-zikre vekâleti Hüseyin b. Yusuf ve Ferman b. Yunus şehâdetleriyle sâbit olan Mevlânâ Abdurrahim b. Mehmed’i meclis-i şer‘a ihzâr edip şöyle iddi‘â etti ki, fahrü’l-muhadderât Fâtıma Hâtun bt. Ali Çelebi, kendisini mahmiye-i Kostantıniyye mahallâtından el-Hâc Küçük [Hacı] mahallesinde vâki‘, iki tarafdan Evrenos Bey b. Abdullah vakfı ile, iki tarafdan da tarîk-i âm ile mahdûd olan biribirine muttasıl üç dükkânının bey‘ine ve kabz-ı semene ve îsâle tevkîl-i devri ile vekîl eyledi. O da vekâlet-i mezbûreyi kabûl etti. Sonra vekâlet-i mahkiyesi ile mezkûr üç dükkânı râyicü’l-vakt on beş bin akçeye mezbûr Mevlânâ Abdurrahim’e sattı. Ve semen-i mezbûru müşterîyi merkūmun yedinden kabz etti. O da müvekkil-i mezbûr malıyla dükkânları andan iştirâ etti. Bâyi‘-i mezbûr, mebî‘i müşteriye teslîm etmek istediğinde müşterî tesellümden imtinâ‘ etti. Müşteriye sorulduğunda “Mebî‘-i mezbûru tesellüm etmiyorum çünkü müvekkile-i mezbûresinin vekâlet-i mahkiyesini inkâr etmesinden ve mebî‘in kendi elimde helâk olmasından dolayı zâmin olmakdan korkuyorum.” diye cevâb verdi. Bâyi‘-i mezbûrdan beyyine taleb edildiğinde Abdurrahman Kethüdâ b. Hüseyin ve Ahmed b. Ali Fakīh ve İsmail b. Mahmud nâm kimesneler hâzırûn olup gıbbe’l-istişhâdi’ş-şer‘î mezbûre Fâtıma Hâtun’un müdde‘î-i mezkûru mebî‘-i merkūmun bey‘ine ve kabz-ı semene ve îsâle tevkîl-i devri ile vekîl eylediğine şehâdet ettiler. Şehâdetleri ba‘de’t-ta‘dîli’ş-şer‘î ve’t-tezkiyeti’ş-şer‘iyye inde’ş-şer‘ makbûl ve mu‘teber olmağın mûcebince hükmedildi. Hâkim, tevkîl-i merkūmun sıhhatine, mebî‘-i mezbûrun teslîmine ve semenin bâyi‘a-i mezbûreye îsâline hükmetti. Cerâ fi’l-yevmi’s-sânî fî Zilka‘de sene 970. Şuhûdü’l-hâl: Mehmed b. Abdurrahman, Sinan b. Mustafa, Hayreddin b. Hüseyin, Mehmed b. Ramazan, Ahmed b. Mehmed, Hüseyin b. Yusuf, Ömer b. Yunus, Karaman b. Yunus, Davud b. Mahmud, Ahmed b. Emir ve gayruhüm