Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 229 Hüküm no: 342 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ardondo bt. Mihal ve iki kızının Ergirü v. Koçkari’nin mirasçıları olduğu Fener kazâsına tâbi‘ Tatay nâm karyeden Ergirü v. Koçkari nâm zimmî nefs-i Rodosçuk’da merhûm Rüstem Paşa’nın dükkânlarında mürd olup metrûkâtından on beş bin sekiz yüz doksan üç akçesi Tekfurdağı kazâsında beytülmâl emîni olan Mehmed yedinden sene 970 Recebi’nin on üçünde Hızâne-i âmireye teslîm olunmuşdur. Hâliyâ Ardondo bt. Mihal nâm zimmîye gelip ben mürd olan mezbûr zimmînin menkûhasıyım ölünce taht-ı nikâhında idim ve Fenko nâm sagīre-i zimmîye sulbiye kızıdır ve Apostol nâm sagīr mezbûr müteveffânın sulbî oğlu olan Yani nâm zimmînin sulbî oğludur ve ben mezbûrânın kıbel-i şer‘den mansûbe vasîsiyim verâset bana ve mezbûr sagīrlere münhasıradır deyû hâlâ Fener kadısı olan Mevlânâ Musa b. Hüseyin’den nakl-i şehâdet ibrâz edip da‘vâ eyledikde Mustafa b. Mehmed ve Safer b. Yusuf ve Tâcir Hasan b. Abdullah ve Halil b. İbrahim ve Attâr Bekir b. Mehmed nâm kimesneler şehâdetleriyle Fazlullah b. İbrahim ve Emrullah b. Lütfullah tezkiyeleri ile hükm olundu. Fî evâhiri Zilka‘de sene 970.