Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 234 Hüküm no: 352 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem Paşa Vakfı’nın İskaradin kazâsındaki vakıflarını icâreye alan Halil Ağa’nın borcunu kabulü ve kendisine babasının kefil olması Sebeb-i tahrîr-i hurûf oldur ki, Merhûm ve mağfûrun-leh Rüstem Paşa -yesserallâhu lehû fi’l-âhireti mâ-yeşânın- evkāfına bi’l-fi‘il mütevellî olan fahrü’l-emâsil ve’l-akrân Mehmed Bey b. Abdülmennân meclis-i şer‘-i şerîf ve mahfil-i dîn-i münîfde umdetü’l-emâsil Halil Ağa b. İbrahim mahzarında ikrâr ve takrîr-i merâm edip evkāf-ı mezbûreden İskaradin kazâsında Soben nâm nehir ile dâir olan yirmi bir bâb değirmeni ve üç bâb dingi ve mezbûr değirmenler kurbunda olan vakıf karyeyi bundan akdem sene dokuz yüz altmış sekiz Şevvâli’nin gurresinden sene-i mezbûre gāyetine varıncaya değin mezbûr Halil Ağa’ya elli bin akçeden icâreye vermiş idim ve ol dahi icâreye alıp meblağ-ı mezbûrdan yirmi sekiz bin altı yüz akçesin mezbûrdan alıp kabz edip bâkī yirmi bir bin dört yüz akçe kalmış idi, hâlâ bazı mevâni‘ olmağla sene-i mezbûrede mezbûr değirmenler ahyânen battâl kalıp ücretten naks lâzım olduğuna kuzâtdan arz getirmekle on bin dört yüz akçe ücrette bâkīyeden aşağı varılıp ücret-i bâkīye-i mezbûreden mezbûrun zimmetinde lâzimü’l-edâ on bir bin akçe deyn bâkī kaldı ve zikr olunan deyn yetmiş bir Muharremi gurresinden altı aya dek va‘de ve senedim kaldı dedikde mukırr-ı mezbûru mezbûr Halil Ağa bi’l-muvâcehe tasdîk edip fi’l-vâki‘ ücret-i mezbûreden zimmetinde on bir bin akçe bâkīdir dedikden sonra mezbûr Halil Ağa’nın babası merkūm İbrahim merkūm Halil Ağa’nın emriyle deyn-i mezbûra kefîl oldum dedikde mezbûr mütevellî mukırr-ı mezbûrun ikrârını tasdîk ve kefâlet-i mahkiyeyi kabûl edicek mâ-vaka‘a bi’t-taleb kayd olundu. Tahrîren fî evâili Zilhicce sene 970. Şuhûdü’l-hâl: Behrâm Kethüdâ, Ahmed Çelebi b. Şuca‘, Mehmed b. Abdullah el-üstâd, Hacı Mehmed b. Osman el-mütevellî, Muharrem Bey b. Abdullah ez-za‘îm, Hürrem Bey b. Abdullah