Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 238 Hüküm no: 360 Orijinal metin no: [65a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âbide bt. Molla Muslihiddin’in, Mevlânâ Mehmed Çelebi b. Mevlânâ Nuh’dan muhâlaa yoluyla boşanması Âbide bt. Molla Muslihiddin nâm hâtun kıbelinden celbe ve ibrâya ve husûs-ı âtîye mezbûr hâtunun karındaşları olan Mehmed Çelebi ve Bünyamin Çelebi b. Muslihiddin nâm kimesneler şehâdetleri ile âti’z-zikr vekâlet-i mutlakası sâbit olan Mevlânâ Muslihiddin b. Ömer nâm kimesne meclis-i şer‘-i şerîf ve mahfil-i dîn-i münîfde mezbûre Âbide Hâtun’un zevci olan Mevlânâ Mehmed Çelebi b. Mevlânâ Nuh mahzarında ikrâr ve takrîr-i merâm edip bundan akdem mezbûr Mehmed Çelebi müvekkile-i merkūmeme otuz beş bin akçe mehr ile nikâh etmiş idi, hâlâ mezbûr Mehmed Çelebi müvekkile-i merkūmemin mehrinin on sekiz bin akçesin verip ve bir mikdârın tuta Mihmân nâm bir câriye verecek olup ve müvekkile-i merkūmem mehr-i mezbûrun bâkīsinden ferâgat etmek üzre ve nafaka-i iddeti üzre ve sâir hukūk-ı zevciyyeti üzre benim ile muhâla‘a eyledi ve ben dahi vech-i meşrûh mezbûr ile muhâla‘a edip zikr [olunan] on sekiz bin akçeyi ve câriye-i mezbûreyi bî-kusûr alıp kabz eyledim ve mezbûr Mevlânâ Mehmed Çelebi’nin zimmetini cemî‘ da‘vâdan ve eymân ve muhâsamâtdan müvekkile-i merkūmem kıbelinden ibrâ-i âmla ibrâ ve iskāt eyledim dedikde mukırr-ı mezbûru cemî‘ ikrârında mezbûr Mehmed Çelebi bi’l-muvâcehe tasdîk ve ibrâsını kabûl edicek mâ-vaka‘a bi’t-taleb kayd olundu. Fî 15 Zilhicce sene 970. Şuhûdü’l-hâl: Fahrü’l-ulemâ’i’l-izâm Şah Mehmed Çelebi Efendi el-müderris, Umdetü’l-ulemâ ve’l-ahâlî Mevlânâ Molla Çelebi el-müderris, Fahrü’l-müderrisîn Mevlânâ Sinan Çelebi el-müderris, Abdi Çelebi b. Haydar en-nâib, es-Seyyid Atâullah b. es-Seyyid Ahmed, el-Hâc Ahmed b. Ali el-muhzır, Abdi b. Ahmed el-muhzır, Muharrem b. Hüseyin el-muhzır ve gayruhüm