Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 248 Hüküm no: 382 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Kasım’ın eşinin ve oğlunun vefatı ile üzerine düşen evdeki hissesi karşılığında beş altın aldığı Emine bt. Kasım nâm kimesne beylerbeyi çavuşlarından Mehmed b. Yusuf ve Haydar b. Yusuf nâm karındaşlar mahzarında ikrâr ve takrîr-i merâm edip bundan akdem fevt olan zevcim Ahmed b. İlyas nâm kimesne fevt oldukda mezbûr zevcimden olan oğlum Mehmed’e âti’z-zikr olan evden bir hisse değip oğlum fevt olup ol hisse bana değip mezbûr zevcim mezbûrân Mehmed ve Haydar’ın vâlideleri olan Ayşe’nin karındaşı olmağla İstanbul’da Taşçı Hacı Başı mahallesinde vâki‘ olan Haseki Sultan odaları ile ve bir tarafı Nakkaş Hüseyin b. Abdullah mülkü ile ve bir tarafı İskender Subaşı b. Abdullah mülkü ile ve bir tarafı tarîk-i hâs ile mahdûd olan evden hisse taleb etmekle münâza‘a ve muhâsama etmiş idim hâlâ zikr olunan hissem mukābelesinde beş altın alıp kabz edip zimmetlerini cemî‘ da‘vâdan eymân ve muhâsamâtdan umûmen, husûsen meblağ-ı mezbûra müte‘allik olan da‘vâdan ibrâ-i âmla ibrâ ve iskāt eyledim dedikde mukırr-ı mezbûru mezkûrân Mehmed ve Haydar bi’l-muvâcehe tasdîk edicek mâ-vaka‘a bi’t-taleb kayd olundu. Fi’l-mezbûr. Şuhûdü’l-hâl: Ahmed b. Ali, Abdi b. Ahmed, İskender Subaşı b. Abdullah