Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 254 Hüküm no: 396 Orijinal metin no: [70a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Bâli’nin muhallefâtından zapt edilen akçelerin verilmesi için eşi Hânî bt. Hızır’ın talebi Oldur ki, Âti’z-zikr olan müteveffânın oğlu Ahmed nâm sagīra kıbel-i şer‘den vasî olan Hânî bt. Hızır nâm hâtunun kıbelinden da‘vâya ve kabza bimâ hüve tarîki’s-sübût şer‘an vekâlet-i mutlakası sâbit olan Ahmed b. Mehmed nâm kimesne dîvân-ı âlî lâ-zâle mehbitan li’l-feyzi’l-bârîye hâzır olup emâcid-i mükerremeyn-i deftereyn katlarında ve mahrûse-i Kostantıniyye’de hâlâ beytülmâl-i hâs emîni olan Mustafa Çelebi b. Behmen ve kâtibi Derviş Çelebi b. Nasûh mahzarında takrîr-i merâm edip bundan akdem dîvân-ı âlîye hâzır olup emâcid-i mükerremeyn-i mezbûreyn katlarında ve mezbûrân emîn ve kâtib mahzarlarında Edirne’de Dâye Hâtun mahallesinde mütemekkin olup sefer-i hümâyûnda Erzurum’da fevt olup muhallefâtından on sekiz bin yedi yüz yetmiş üç akçe sefer-i hümâyûnda beytülmâl emîni olan Mehmed yedinden işbu sene dokuz [yüz] altmış yedi Rebî‘ulevvelinin on birinde Hızâne-i âmireye teslîm olunan erbâb-ı zu‘amâdan Hasan b. Bâli nâm kimesnenin mezbûr sagīr sulbî oğlu olup ve mezbûre müvekkilim zevcesi [70b] ve verâseti mezbûr Ahmed ile ölünce taht-ı nikâhında olan mezbûre Hânî’ye münhasıra idiği mahrûse-i Edirne Kadısı olan Molla Seyyid Hasan’dan nakl-i şehâdet ibrâz edip davâ eylediğimde ( ) şehâdetleri ile sâbit olup ve pâye-i sa‘âdet masîre arz olunup meblağ-ı mezbûrun edâsı bana hükm olunup yedime hüccet-i şer‘iyye verilmiş idi, hâlâ mezbûr müteveffânın timarı mahsûlünden yirmi altı bin sekiz yüz otuz akçesini dahi kazâ-i Selânik’de beytülmâl emîni olan Cafer kabz edip Selânik kadısının irsâliyesi olan elli sekiz bin yedi yüz dört akçe ile ma‘an sene 967 Cemâziyelâhiresi’nin on ikisinde Hızâne-i âmire-i mezbûreye teslîm eylemişdir hâlâ meblağ-ı mezbûru dahi vekâlet-i mahkiyem ile taleb ederim deyû husûs-ı kaziyyeyi müştemile ve mazmûnu bimâ hüve tarîki’s-sübût şer‘an sâbit hüccet-i şer‘iyye ibrâz edip da‘vâ eyledikde hüccet-i şer‘iyye mûcebi ile hükm olundu. Tahrîren fî evâhiri Zilhicce sene 970 971 senesi gurre-i Muharrem-i harâmında vâki‘ olan vekāyi‘