Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 256 Hüküm no: 399 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’da Eski Saray vakıf odaları yakınındaki arazinin Padişahın izniyle Fâtıma bt. Hızır’a satılması Sultan-ı a‘zam ve hakan-ı mu‘azzam mâlik-i rikābi’l-ümem mevlâ-yı mülûkü’l-Arab ve’l-Acem Sultan-ı selâtîni’z-zamân halef-i hulefâi’r-rahmân min âl-i Osman es-Sultan b. es-Sultan Süleyman Hân b. el-merhûm Selim Hân hazretleri kıbelinden husûs-ı âtîye bimâ hüve tarîki’s-sübût şer‘an vekâlet-i mutlakası sâbit olan zahrü’l-a‘yân binâ emîni Sinan Ağa b. Abdurrahman kıbelinden husûs-ı âtîye Hüdâverdi b. Abdullah ve Mehmed b. Mustafa nâm silâhîler şehâdetleriyle vekâleti sâbit olan Ahmed Bey b. Abdullah meclis-i şer‘-i şerîfde Fâtıma bt. Hızır nâm hâtun kıbelinden …? Mustafa b. Resûl ve Mehmed b. Abdullah şehâdetleriyle vekâleti sâbit olan Hüseyin b. Abdullah mahzarında ikrâr ve takrîr-i merâm edip müvekkilimin müvekkili olan cenâb-ı sâlifü’l-ensâb hazretleri mahmiye-i İstanbul’da Saray-ı atîk-i âmirelerinde ifrâz olunup bey‘ olunmasına fermân-ı şerîfleri olan arâziden câmi‘-i şerîfin vakıf odaları kurbunda vâki‘ yer ki bennâ zirâ‘ıyla ve arzan sekiz zirâ‘dır cümle iki yüz elli zirâ‘ydı beş bin akçeye mezbûre Fâtıma’ya beş bin akçeye bey‘ eyleyip semenini bî-kusûr alıp kabz eyledi dedikde mukırr-ı mezbûru mezbûr Hüseyin bi’l-muvâcehe tasdîk edicek mâ-vaka‘a bi’t-taleb kayd olundu. Tahrîren fî evâhiri Muharrem sene 971. Şuhûdü’l-hâl: Nasûh b. Abdullah, Ahmed b. Süleyman, Mehmed b. Süleyman ve gayruhüm