Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 258 Hüküm no: 404 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Hüseyin b. el-Hâc Hamza’nın muhallefâtı için akrabalarının açtığı verâset davası Kaziyye oldur ki, Bundan akdem nefs-i Manisa’da Yeni Câmi‘ mahallesinde mütemekkin olan el-Hâc Hüseyin b. el-Hâc Hamza nâm kimesne sene 950 târihinde mahrûse-i Cezâyir’e gidip hayâtı ve memâtı ma‘lûm olmadığı ecilden muhallefâtından on bin yedi yüz yetmiş akçesini livâ-i Saruhan nâzırı Mevlânâ Muhyiddin mevkūfât için zabt eyleyip sene 963 Rebî‘ulâhirinin yirmi dördünde gurebâ cemâ‘atinden havâle olan Mehmed yedinden Hızâne-i âmireye teslîm olunmuşdur. Hâliyâ Bostan b. Musa nâm kimesne gelip mezbûr el-Hâc Hüseyin nâm kimesne sene 970 Ramazanı’nda Cezâyir’den marîz gelip Emin İskelesi önünde fevt oldu ben müteveffâ-yı mezbûrun li eb ve üm karındaşı Musa b. el-Hâc Hamza’nın sulbî oğluyum verâset bana ve müteveffâ-yı mezbûrun vâlidesi Şâhî bt. Mehmed nâm hâtun ve li eb ve üm kız karındaşı Ruşen nâm hâtuna münhasıradır deyû da‘vâ eder ve Ali b. Mustafa nâm kimesne dahi gelip mezkûrân hâtunların da‘vâsına ve kabz-ı mâla vekîlim deyû hâliyâ Manisa kadısı olan Mevlânâ Süleyman b. el-Hâc Yakub’dan nakl-i şehâdet ibrâz edip asâleten ve vekâleten da‘vâ-yı verâset etdiklerinde kasaba-i mezbûre sükkânından Muslihiddin b. Hüseyin el-imâm ve Yusuf b. Veli et-tâcir nâm kimesneler şehâdetleriyle isbât ettikden sonra Muhyiddin b. Kurd ve Şuca‘ b. Veli nâm kimesneler tezkiyeleri [ile] hükm olundu. Fi’l-mezbûr. Şuhûdü’l-hâl: ( )