Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 274 Hüküm no: 434 Orijinal metin no: [77b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhallefâtı beytülmâlce zabtolunan Hasan Ağa’nın Haslar kazâsındaki evlerinin müzâyede ile Şehzâde Mehmed’in kızı Hümâ Sultan’a satıldığı Sebeb-i tahrîr-i hurûf oldur ki, Hâlen beytülmâl emîni Mustafa Çelebi b. Himmet nâm kimesne meclis-i şer‘-i şerîfde durretü iklîli’l-azameti ve’l-celâl gurretü cebîni’s-sa‘âdeti ve’l-ikbâl el-mahsûsa bi inâyeti’l-meliki’l-mennân hazreti Hümâ Sultan bt. el-merhûm el-mağfûrun-leh es-sa‘îd eş-şehîd şehzâde Sultan Mehmed kıbelinden umdetü’l-vüzerâi’l-kirâm zübdetü’l-küberâi’l-fihâm zi’l-kadri’r-refî‘ ve’l-câhi’l-menî‘ Hazret-i Ferhad Paşa b. Mehmed kıbelinden husûs-ı âtîye vekâlet-i mutlakası sâbit olan umdetü’l-ekâbir ve’l-a‘yân kethüdâları olan Mustafa Kethüdâ b. Abdülmennân nâm kimesne mahzarında ikrâr ve takrîr-i merâm edip bundan akdem fevt olup cemî‘ muhallefâtı beytülmâl-i mezkûra zabt olunan dergâh-ı âlî çaşnigirlerinden iken za‘îm olan Hasan Ağa’nın muhallefâtından Hâslar kazâsı tevâbi‘inde karye-i Vigere’de vâki‘ olup iki karşılı evleri ortası suffeyi ve yan suffeleri önünde havuz ve fıskiyeyi ve kapının iç tarafında iki tahtânî oda ve bir büyük damı ve taşrasında otuz at alır bir büyük ahır ve bir büyük evi ve bostanı ve bir hayâtı ve bir ahırı ve yedi kara sığır ve bir inek buzağısı ve altı araba bir bağ yerini müştemil olup bir tarafdan Sinan b. Abdullah ve bir tarafdan Yusuf b. Abdullah ve üç tarafdan tarîk-i âmla mahdûd olan [menzil] mirâren beyne’t-tâlibîn ve’r-râgıbîn müzâyede olunup otuz bin akçede mezbûr vekîlin üzerinde karâr eyleyip mezbûr vekîl otuz bin akçeye bey‘ eyledim deyû ikrâr-ı sahîh-i şer‘î ettikde mukırr-ı mezbûru mezkûr vekîl bi’l-muvâcehe tasdîk edicek mâ-vaka‘ bi’t-taleb kayd olundu. Fî evâhiri Muharrem sene 971. Şuhûdü’l-hâl: İbrahim Çavuş, Mehmed Çavuş b. Mustafa Çavuş Kamer bt. Abdullah nâm hâtun kıbelinden Müyesser b. Ali vekîl idiğine Hüseyin b. Kasım ve Kasım b. Hüseyin şehâdet etti.