Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 294 Hüküm no: 475 Orijinal metin no: [82b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köle bedelinin alındığı Hâssa sarrâclardan Süleyman Çelebi b. el-Hâc Ahmed kıbelinden Hasan b. el-Hâc İlyas ve Emrullah b. Nurullah nâm kimesneler şehâdetleriyle vekâleti sâbit olan mezbûr Süleyman Çelebi’nin vâlidi mezbûr el-Hâc Ahmed nâm kimesne meclis-i şer‘-i şerîfde bundan akdem fevt olan Ahmed Bey b. el-merhûm Kasım Paşa’nın muhallefâtını zabta vasiyy-i muhtâr olan fahrü’l-müderrisîni’l-kirâm Mevlânâ Mehmed b. Abdülaziz nâm kimesne kıbelinden husûs-ı âtîye Rahmi b. Mehmed ve el-Hâc Yusuf b. Abdullah nâm kimesneler şehâdetleriyle vekâleti sâbit olan Mevlânâ Bayezid b. Bahşâyiş mahzarında ikrâr ve takrîr-i merâm edip bundan akdem mezbûr müvekkilimin Kasım b. Abdullah ve İskender b. Abdullah nâm kulları mezbûr müteveffânın muhallefâtından kırk birer filoriye satın aldıkdan sonra Receb b. Yusuf nâm kimesne gelip müstahık idiğin isbât edip müvekkilimden aldıkdan sonra ben dahi vekâletim ile zikr olunan meblağ ile vasiyy-i mezbûra mürâca‘at ettiğimde zikr olunan seksen iki filoriyi mezbûr vasî yedinden bî-kusûr alıp kabz eyledim dedikde mukırr-ı mezbûru mezkûr Mevlânâ Bayezid bi’l-muvâcehe tasdîk edicek mâ vaka‘a bi’t-taleb kayd olundu. Fî evâhiri Saferi’l-hayr sene 971. Şuhûdü’l-hâl: Mevlânâ Hamdi b. el-müderris, Mahmud b. Abdülkerim, Behrâm b. Abdullah ez-zevvâk, Rahmi b. Mehmed, Mehmed b. Bekir