Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 307 Hüküm no: 502 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ev satın alınması ihtilafında sulh olunması Kamer ve Mustafa veledey Mirza b. Üveys nâm kimesneler meclis-i şer‘-i şerîfde bundan akdem fevt olan Ali b. Murad nâm kimesne oğlu sagīr Ahmed’e kıbel-i şer‘den vasî olan Ahmed b. Receb nâm kimesne ve fahrü’l-akrân merhûm Ahmed Paşa kethüdâsı Hasan Bey b. Abdurrahman nâm kimesne mahzarında ikrâr ve takrîr-i merâm edip mezbûr sagīrin babası sâbıkan bize vasî olup yedi bin beş yüz akçe kabz edip bizim dedemizden intikāl eden, Edirnekapısı kurbunda Hacı Muhyiddin mahallesinde bir cânibden mezbûr Hasan Kethüdâ mülkü ile ve bir tarafı Kamer bt. Abdullah ve bir tarafı Manol en-nasrânî ve bir tarafı Mustafa b. Abdullah mülkü ile mahdûd olan yerimizi beş yüz akçeye bey‘ edip kabz etmeğin mezbûr fevt oldukda sagīr-i mezbûrun vasîsi olan mezbûr Ahmed ve mezbûr Hasan Kethüdâ ile mâ-beynimizde münâza‘a ve muhâsama vâki‘ olmuş idi hâlâ on beş altın vasiyy-i mezbûr yedinden ve on altın Hasan Kethüdâ’dan alıp kabz eyleyip mezbûrların zimmetlerini cemî‘ da‘vâdan ve eymân ve muhâsamâtdan ibrâ ve iskāt eyledim dedikde mukırr-ı mezbûru, mezbûrân Ahmed ve Hasan Kethüdâ bi’l-muvâcehe tasdîk ve ibrâsını kabûl edicek mâ vaka‘a bi’t-taleb kayd olundu. Fî evâhiri Rebî‘ilevvel sene 971. Şuhûdü’l-hâl: Mustafa b. Hızır, Ali Bey b. Abdullah, Abdi b. İbrahim, Mehmed Bey b. Abdullah, Abdullah Bey b. Abdullah, Abdullah b. Abdullah, Hürrem Bey b. Abdullah, Mehmed Bey b. Abdullah, Cafer b. Abdullah, el-Hâc Abdullah b. Abdullah